Nuwe ontwikkeling bedreig Moederkerk

GEORGE NUUS - Sekerlik die bekendste en mees geliefde landmerk in die ganse George, die Nederduits Gereformeerde Moederkerk in Courtenaystraat, se straataansig is in die gedrang.

'n Gautengse maatskappy, AFD-ontwikkelaars is in onderhandelinge met die munisipaliteit en die bestuur van die kerk gewikkel om 'n kantoorblok cum winkelsentrum reg voor die hoofingang van die kerk te bou.

Die inligting oor die ontwikkeling is op hoë vlak aan George Herald gelek en sal vir gemeentelede en die meeste inwoners van George as 'n groot skok kom.

Indien die onderhandelinge slaag sal dit beteken dat die kerkperseel onderverdeel word en dat die stuk grond tussen die kerk en Courtenaystraat hersoneer word om winkels en kantore daar op te rig.

Volgens die bron is daar ontsaglike druk op die kerkbestuur geplaas om die grond te verkoop en is die Moederkerk 'n astronomiese bedrag aangebied vir die perseel - 'n som wat glo net te goed is om te weier.

Kyk 'n video van die onderhoud en onderonsie met Risum by die kerk hieronder.

Die Besturende Direkteur van AFD-ontwikkelaars, Rideo Risi Risum het gesê George gaan nooit weer dieselfde wees nie. "Ons het groot planne en talle werksgeleenthede sal geskep word."

Die George-munisipaliteit wou nie kommentaar lewer nie behalwe om te sê dat dit 'n sensitiewe aangeleentheid is.
Die kerkbestuur het na herhaalde versoeke vir kommentaar niks van hulle laat hoor nie. Tydens 'n onderhoud met Risum by die moederkerk wou ontstoke lidmate Risum te lyf gaan en moes hy bontstaan om die houe af te weer.

Hierdie berig is vandag voorbladnuus van die George Mini Ads News.
Lees meer oor hierdie aangeleentheid en AFD-ontwikkelaars se planne in môre se George Herald.