Nuwe baadjie vir bouval

GEORGE NUUS - Diegene wat verlede week in Wellingtonstraat, in die Denneoord-omgewing gery het, het sekerlik die bekende bouval se nuwe baadjie raakgesien. Die voor- en sykant van dié huis (skuins oorkant Mr Meat) is onlangs deur die bouspan van 'n plaaslike kontrakteur gepleister.

Volgens die boukontrakteur, wat graag anoniem wil bly, het hy onderneem om al die pleisterwerk en sekere finale afrondingswerk doen. "Ek wil ook help om materiaal te kry soos dakplate en hout," het hy gesê.

Die kontrakteur het egter bevestig dat hy sy span net vir 'n paar naweke kan beskikbaar stel, en dat nog hulp dringend by die projek benodig word. "Hulle benodig verwers en ouens wat die dak kan regmaak," het hy gesê.

Albert Visagie, die koördineerder van hierdie gemeenskapsprojek, het verlede naweek die voor- en agterdeur van die huis geverf en die voordeur se gekleurde glasvensters ingesit.

"Opknappingswerk aan die huis begin nou stadig maar seker vorder na 'n stil tydperk gedurende Desember en Januarie," het Visagie gesê. Die projek word by tye gekritiseer omdat dit nie lyk of daar enigiets aangaan nie.

"Behalwe vir die nuutste veranderinge aan die buitekant, het daar egter baie binne die huis plaasgevind," het Visagie gesê.

"Die badkamer is nou toegerus met 'n nuwe bad, wasbak, toilet en stort, waarmee Outeniqua Plumbers gehelp het.

Daar is egter nog heelwat werk nodig, waaronder teëlwerk. Handearbeid is 'n groot behoefte."

Verder het 'n weldoener van Kaapstad 'n stoof geskenk wat geïnstalleer moet word. Die plafon in die kombuis is geverf en krag is regdeur die huis aangelê. Mr. Sandman het onlangs twee vragte sand vir die bouwerk geskenk.

Vir inligting oor die projek kontak Visagie by 072 190 1790 of besoek die Facebook-blad, 'Gemeenskap Projek - Denneoord'.

Heelwat sement is deur 'n groep weldoeners van die omgewing geskenk. Dit word tans in die huis geberg.

Outeniqua Plumbers het gehelp om die badkamer toebehore te koppel. Heelwat werk is egter nog nodig om die bad behoorlik te stut en die plek op te knap. 'n Teler word nou benodig om die teëlwerk te doen. Die teëls is reeds geskenk. Foto's: Michelle Pienaar

Klik hier vir vorige artikels: