GEORGE NUUS - "Dit lyk rof, ons moes al onder die motorhawe begin pak en toegooi met seile, want ons stoor is vol!"
So het Madeleine Dehantschutter, koördineerder van George se waterprojek, gesê, nadat meer as 11 000 liter water oor die afgelope week ingesamel is.
Hierdie projek wat help om water in te samel vir droë dorpe in die noorde, is steeds fluks aan die gang. Volgens Dehantschutter is daar sedert die aanvang van die inisiatief in Desember verlede jaar meer as 70 000 liter water reeds aan dorpe besorg. Haar mikpunt vir die volgende week is 15 000 liter water.
In Maandag se versengende hitte het Albertinia Meubelvervoer twee trokke na George gestuur om water op te tel.
Die helfte van die water gaan na Winburg, en die ander helfte word na Welkom gestuur. Nog 'n besigheid wat intussen aan boord gekom het is Oakhurst Insurance (sien sakeblad).
'n Stellenbosch-student en boorling van Knysna, Nadya Greeff, beywer haar ook om geld in te samel waarmee haar ouers, eienaars van Greeff-slaghuis in Knysna, water aankoop en weekliks na George stuur. Op Stilbaai help Linda Kruger om veevoer by die boere in te samel, wat ook met Albertinia Meubelvervoer vervoer word. Verder het plaaslike inwoners ook ingespring en begin waterbottels volmaak. Sowat 500 liter water is in Molenrivier, in Rosemoor, volgemaak en besorg vir die projek.
Dehantschutter het verlede week 'n Facebook-groep begin, 'George Pay It Forward (Water Collection & Distribution)', waar inwoners die nuutste nuus oor die waterprojek kan bekom. Sue Wolmarans, die inisieerder van hierdie projek, het hier 'n versoek gerig aan lede van die groep om familie en vriende in die vervoerbedryf in Bloemfontein en Kroonstad te vra om die water wat van die Tuinroete kom na die areas te neem wat dit die meeste nodig het.
Dehantschutter bedank Leon Dorfling wie se perseel gebruik word om die water te stoor, asook Vanie Oosthuizen van Albertinia Meubelvervoer wat weekliks help om die water te vervoer.
Inwoners kan tans water by sewe plekke aflaai:
- Grumpy Griller in Yorkstraat
- Sasol-vulstasie oorkant Eden-gemeente langs die N2
- Eden Caltex-vulstasie oorkant Hoërskool Outeniqua
- Glenwood House
- Tiger Wheel & Tyre in Yorkstraat
- Enjin-vulstasie in Knysnaweg
Indien enigeen water by die ou Tavcor-gebou (in Laingstraat) - waar die water gestoor word - wil aflaai, kontak eers vir Madeleine by
083 397 8106.
Die stoor word nie heeldag beman nie. Vir navrae kontak Madeleine of Sue by 061 835 9720.
Klik hier vir vorige artikels:
- Water bly invloei vir droë dorpe
- Houers nodig vir 10 000 liter water
- Water collection for drought-stricken north
Die stoorplek by die ou Tavcor-gebou in Laingstraat was Maandag volgepak met water vir die droeë dorpe in die noorde. Foto: Madeleine Dehantschutter
ARTIKEL: MICHELLE PIENAAR, GEORGE HERALD-JOERNALIS
'Ons bring jou die nuutste George, Tuinroete nuus'
