NASIONALE NUUS - Die 21ste Absa KKNK wat vanjaar plaasgevind het, het 'n ekonomiese impak van bykans R64,7 miljoen op Oudtshoorn gehad en soveel as R188 miljoen op die Wes-Kaap.
Dit was van die interessante statistiek wat prof. Jen Snowball van Rhodes Universiteit onlangs bekend gemaak het. Sy en emeritus professor, Geoff Antrobus, beide professors in ekonomie, was gaste tydens die besigheidskamer se netwerkaand by die Queens Hotel op 11 Junie.
Kunste Onbeperk het die twee akademici opdrag gegee om navorsing te doen oor die feesgangers en die impak wat die fees hierdie jaar op verskillende sektore gehad het. Vir die berekening van die statistiek is onderhoude met 634 feesgangers gevoer en meer as 100 vraelyste is aanlyn deur lede van die media en produksievervaardigers beantwoord. Snowball het die metode en formules wat met berekeninge gevolg is verduidelik en die volgende statistiek bekend gemaak:
- Die ekonomiese impak van die fees op Oudtshoorn was R64 693 miljoen (Dit beloop 8,6% van Oudtshoorn se bruto geografiese produk)
- Die ekonomiese impak op die Wes-Kaap was tussen R170 miljoen en R188 miljoen
- Besoekers het ongeveer R2 000 elk by die fees spandeer terwyl Oudtshoorniete ongeveer R660 elk spandeer het
- Daar is 534 tydelike werksgeleenthede in Oudtshoorn tydens die fees geskep
- Bykans al die feesgangers, 98% was Suid-Afrikaners waarvan 20% in Oudtshoorn woon
- Die grootste persentasie feesgangers van buite Oudtshoorn (53%) woon in die Wes-Kaap, 16% kom van die Oos-Kaap (53%) en 14% van Gauteng.
- Dat die Absa KKNK 'n unieke Afrikaanse kultuurfees is, is duidelik uit die bevinding dat 83% van die besoekers Afrikaanssprekend is
- Wat bevolkingsgroepe aanbetref was 55% feesgangers wit, 37% bruin en 6% swart. (Snowball het daarop gewys dat die persentasie bruin feesgangers baie toegeneem het teenoor feeste van vroeër)
- Uit 'n grafiek wat die hoofredes vir bywo-ning aantoon het die meeste mense die fees besoek om te ontspan, gevolg deur bywoning van vertonings, inkopies en besigtiging van kuns heelwat laer op die lys
- Die Rivierbuurt was die gunsteling besoekpunt vir meeste feesgangers met vertonings tweede op die lys
- Daar word bereken dat daar ongeveer 33 278 besoekers per feesdag op Oudtshoorn was en dat die gemiddelde feesganger 5, 6 dae by die fees deurgebring het. Dit beteken dat 'n geraamde 186 000 mense die fees bygewoon het.
Na die aanbieding van Snowball het die uitvoerende hoof van Kunste Onbeperk, Rhodé Snyman, gesê dat die navorsing bewys dat die KKNK steeds aan die voorpunt van kulturele feeste staan en dat die toekoms van die fees baie goed lyk.
Sy het ook verwys na die groei wat ondervind word met die jaarlikse Klein Karoo Klassique wat ook deur Kunste Onbeperk op Oudtshoorn aangebied word. Die Klassique vind vanjaar vanaf 13 tot 16 Augustus plaas.
'Ons bring jou die nuutste Tuinroete, Klein-Karoo, Hessequa nuus'
