Herstelwerk by bouval vir eers op ys

GEORGE NUUS - Herstelwerk by die bouvallige huis in Wellingtonstraat, in Denneoord, het sedert begin Desember tot 'n stilstand gekom.

Die inwoners word gereeld deur inwoners genader wat graag wil weet wanneer dié opknappingsprojek dan nou uiteindelik gaan klaarkom.

Die projek is verlede jaar van stapel gestuur deur 'n boukontrakteur Albert Visagie, wat as koördineerder optree. Hy doen gereeld beroepe op hul Facebook-blad 'Gemeenskap Projek - Denneoord' vir donasies van materiaal en hulp met vakmanskap. "Alhoewel ons al heelwat gedoen het, het ons dringend nog hulp nodig," het hy gesê.

"Daar was baie beloftes, maar die ouens pitch nie. Is ek die enigste kontrakteur in George wat bereid is om 'n ekstra myl te loop?"

Dit was wel nou Desembermaand en almal was lus vir vakansie hou, so Visagie hoop dat meer mense nou in die nuwe jaar na vore sal kom.

Tans benodig hulle dringend sinkplate vir die dak, hout vir die dakkappe wat verrot is en sand, sement en arbeid om die mure te pleister.

"Die dak was vol gate, wat beteken het dat die reënwater tussen die pleisterwerk en die bakstene deurgesyfer het.

Die pleister is nou verwyder, en ons kon die meeste gate in die dak toemaak. Alles is nou droog," het hy gesê.

Huiseienaars Koos en Gertruida Williamson voel hulle kan nie meer hul koppe by die deur uitsteek sonder dat mense hulle trompop loop oor die huis nie. "Ek kan nie eers kliniek toe gaan nie, dan wil hulle weet oor die huis," het Gertruida gesê.

Vir inligting kontak Visagie by 072 190 1790.

Klik hier vir vorige artikels:

'n Splinternuwe stort is reeds in die badkamer, maar die pype moet geskuif word voordat 'n nuwe toilet, wasbak en bad ingesit kan word. Dit is reeds geskenk, sowel as teëls vir die vloer. Die dienste van 'n loodgieter word dringend benodig.