GEORGE NUUS - Twee broers van George se visvanguitstappie verlede naweek het lelik skeef geloop toe hulle vriend by Lientjiesklip in Wilderness deur rowers oorrompel is.
Jaco Stevens (21) en sy ouer broer Robert (24) het saam met 'n "kuiervriend", wat hulle net ken as "Koppe", regs van Lientjiesklip hul viermantent opgeslaan. Koppe woon in Kaapstad en het die naweek by hulle kom kuier.
Die broers het vroegaand vir verversings na die kafee gestap, terwyl hulle vriend lyn natmaak. Met die terugkoms het hulle hom op die sand aangetref, op sy maag, met sy hande en voete vasgebind. Volgens Jaco was daar minstens twee booswigte, want Koppe het gehoor hoe hulle met mekaar praat.
"Hulle het alles gevat. Visvangsakke en die tent," het Jaco gesê. Gelukkig het ons nie met 'n motor gekom nie, my ma het ons kom aflaai, want ons sou oornag. Hulle was omstreeks 10:00 terug by die huis.
Volgens Jaco was Koppe getraumatiseer deur die gebeure. Jaco het nie 'n kontaknommer vir sy vriend nie. "Ons moes hom kalmeer, maar die ou het darem later weer gelag. Hy het groot geskrik," het Jaco gesê.
Die broers het besluit om nie die saak by die polisie te open nie, "want dit gaan tog nie help nie," het Jaco gesê. Hy reken wanneer hulle weer gaan visvang sal hulle in groter getalle die waters aandurf.
"Dit is die eerste keer wat so iets met ons gebeur," het Jaco gesê. "Ons het groot geskrik."
Pieter Raath, eienaar van Tackle Traders, 'n visvangwinkel in Hopestraat, raai hengelaars aan om liefs pepersproei saam met hulle te dra wanneer hulle gaan hengel. "Dit kan ook goed werk vir fietsryers, wat deesdae al hoe meer 'n teiken word," het hy gesê.
ARTIKEL: MICHELLE PIENAAR, GEORGE HERALD-JOERNALIS
'Ons bring jou die nuutste George, Tuinroete nuus'
