Annchen se moordenaar sê hy's jammer

GEORGE NUUS - Meer as twee jaar ná die moord op die dieetkundige van George, Annchen Ferreira (31), is haar moordenaar uiteindelik gevonnis. Clive Bailey, haar eertydse vriend, is verlede Donderdag in die Kaapse hooggeregshof tot 20 jaar tronkstraf gevonnis, waarvan vyf jaar opgeskort is. Hy het haar in haar woonstelkompleks in Milnerton ten aanskoue van ander inwoners op 26 Mei 2013 verwurg en aangerand.

Annchen se ouers, Ona en Johan Ferreira, is inwoners van George en het die hofsaak verlede week bygewoon. Die saak het op 16 November voorgekom. Bailey het skuldig gepleit op moord en 'n pleitooreenkoms is drie dae later bereik.

Luidens die pleitooreenkoms kan Bailey nie teen sy vonnis appelleer nie. Hy sal eers na agt tot tien jaar vir parool in aanmerking kom. Carien Theunissen was die staatsaanklaer en advokaat Pete Mihalik het vir die verdediging opgetree.

Volgens Johan Ferreira het Bailey hulle in die hof om verskoning gevra.

"Hy het gesê hy gaan die tyd in die tronk gebruik om 'n beter mens te word en ontslae te raak van sy issues.

"Hy het ook om vergifnis gevra," het Ferreira gesê.

"Ons vergewe hom vir wat hy aan ons gedoen het, maar ons kan hom nie vir sy daad vergewe nie. Ons gee nie daardie lewe nie - hy moet by God daarvoor vergifnis ontvang."

Volgens Ferreira het Bailey gevra dat hulle hom in die tronk sal besoek. Ferreira het egter gesê hy sal eers na 'n jaar of drie daarvoor kans sien. Voordat Bailey na sy sel begelei is, het Ona Ferreira ook met hom gepraat.

"Ek het die krag gekry om soos wat hy daar geboei gestaan het, te praat," het sy gesê.

"Ek het vir hom gesê Annchen wou hom regtig net help om beter keuses te maak. Ek het saam met hom gehuil en hom 'n drukkie gegee."

Na 'n baie emosionele tyd hou die Ferreira-egpaar vir nog 'n week in Plattekloof vakansie.

"Dis verby, ons moet nou aangaan. 'n Mens besef dis nou finaal," het Johan gesê. "Ons is tevrede met die vonnis. Ons hoop hy kom tot opregte bekering en kan getuienis in die tronk lewer. Net hy alleen kan homself gelukkig maak."

'n Groep van sowat veertien ondersteuners van Annchen, waaronder vriende en oudkollegas, het die hofverrigtinge bygewoon.

Hulle het voorgestel dat haar ouers elke jaar haar sterfdag, 26 Mei, saam met hulle in die Kaap gedenk.

"Hulle sê ons is nou familie," het Johan Ferreira gesê.

"Ons het ongelooflike ondersteuning van oral ontvang."

Klik hier vir vorige artikels:

Moedersdag-vreugde in Mei 2013, dae voor haar dood op 26 Mei. Hierdie foto hou 'n besondere herinnering vir Ona (regs), want sy was daardie dag met 'n besoek van Annchen (links) en 'n groot bos blomme verras. Foto: Johan Ferreira