GEORGE NUUS - Die Afrikaanse Christelike Vrouevereniging (ACVV) in George bring Saterdag 13 September die hoogs gerespekteerde akademikus, politieke aktivis en kommentator, Rhoda Kadalie, na George as gasspreker vir 'n ACVV-fondsinsamelingsontbyt by Fancourt.

Die ACVV lewer maatskaplike dienste aan kwesbare kinders, vroue, gesinne en ouer persone. ACVV George se bestuurder, Riana Lategan, sê hulle het baie moeite gedoen om Kadalie vir die geleentheid te bekom en dat dit 'n rare geleentheid is om dié formidabele spreker in aksie in George te sien.

Kadalie is die uitvoerende direkteur van die Impumelelo Social Innovations Centre wat in 1999 gestig is om sosiale innove-rings (regerings en siviele gemeenskapsinisiatiewe ingesluit) te beloon wat armes se lewenskwaliteit verbeter. Kadalie publiseer 'n jaarlikse tydskrif wat die wenners se stories publiseer. Onder haar leiding het 167 gevallestudies oor 'n breë spektrum sektore verskyn insluitend MIV/Vigs, sanitasie en afvalbestuur, voedselsekerheid, onderwys, vaardigheidsontwikkeling, omgewingsake, landelike ontwikkeling en nog baie meer.

Voor Impumelelo is sy in 1995 deur president Nelson Mandela as 'n menseregte kommissaris vir die Wes- en Noord-Kaap aan-gestel.
Van 1976 tot 1995 het sy sosiale antropologie doseer en was sy ook die stigter van die geslagsgelykheideenheid by die Universiteit van die Wes-Kaap. Kadalie het dwarsoor die wêreld aanbiedings gedoen oor menseregte en geslagspolitiek in Suid-Afrika.

Sy is 'n gerespekteerde akademikus met drie ere-doktorsgrade. In 2003 het sy 'n menseregtetoekenning in Kanada ontvang en in 2010 het sy vir haar rubrieke die Rapport/City Press Prestige toekenning ontvang. Haar boek, In Your Face: Passionate Conversations about People and Politics, het in 2009 verskyn en haar tweede boek, The Politics of Pregnancy, in samewerking met haar dogter, Julia Bertelsmann, is deel van 'n reeks, Kort en Kragtig, To the Point wat in 2012 die lig gesien het.

Kadalie is reeds jare lank gasrubriekskrywer vir Business Day en skryf ook vir Die Burger, Beeld, Politicsweb en The Citizen. Sy het in 2011 vir sewe weke aan boord die Semester at Sea Ship (University of Virginia) doseer tydens 'n vaart van Ghana na Kaapstad.
Die heerlike buffet-ontbyt vind Saterdag 13 September om 10:00 in die banketsaal by Fancourt plaas en kaartjies is R250 pp. Kaartjies is beskikbaar by die ACVV-kantoor op die hoek van Cradock en Marbe-riusstrate. Vir meer inligting kontak Riana by 044 874 2030 of e-pos acvvgeorge@telkomsa.net.

'Ons bring jou die nuutste George, Tuinroete nuus'

Read more about: spreker acvv rhoda kadalie