LANDBOU NUUS - Tans gaan Suider-Afrika gebuk onder een van die ernstigste droogtes die afgelope 20 jaar.
Die landswye droogte volg op 'n baie swak 2014 seisoen in die meeste gedeeltes van die land. In die somer saaigebiede is daar steeds nog nie geplant nie en graanpryse het reeds begin styg. Ten minste ses weke van groei in die natuurlike weidings is reeds verlore en oesreste vir die komende winter sal beperk wees. Dit plaas klaar ernstige druk op voervoorsiening in die komende winter wat kuddebou sal demp.
In KwaZulu-Natal alleen, het daar al meer as 40 000 beeste gevrek en groot veeverliese word tans landswyd in die opkomende sektor ervaar. Watervoorsiening vir vee het ook nou krisis afmetings aangeneem met damme, vleie, spruite, fonteine, boorgate en riviere wat opgedroog het.
Nuwe boorgate word met beperkte sukses teen hoë kostes geboor. In baie gevalle word water aangery en in party plekke vir sovêr as 15 km. In die hittetoestande is die waterverbruik van beeste tussen 40 en 50 liter per bees per dag, wat die logistiek van watervoorsiening moeilik maak.
As die droogte binnekort gebreek word met 'n normale seisoen verder, sal:
- die aanbod van slagskape daal as gevolg van kuddebou;
- oor die medium/langer termyn gaan vleispryse ook styg al het dit gereën aangesien boere gaan kuddes bou na die droogte. Dit skep ‘n skaarste aan die aanbodkant;
- die aanbod van speenkalwers daal as gevolg van kuddebou;
- die slagting van voerkraalbeeste stabiel bly vir die volgende paar maande aangesien die staankapasiteit in die voerkraalbedryf tans die hoogste ooit is met 560 000 eenhede;
- die aanbod van C-graad bees (fabrieksvleis) daal as gevolg van kuddevou, uitgesluit melkkoeie waarvan die slaggetalle slegs verder sal daal as die melkprys wesentlik styg;
- speenkalfpryse hoër neig, maar die hoë mielieprys sal uitermatige hoë spronge demp. Bees- en skaapvleis pryse sal bokant inflasie styg; en
- lam en kalfpersentasies sal laer wees omdat vroulike diere in n swak kondisie is wat ook aanbod sal verlaag
- meer jong vroulike diere (vervangingsverse) ook op die kort termyn in die voerkrale opeindig en moontlik geslag word wat op die langtermyn die kalfpersentasie en dus aanbod en prys van speenkalwers kan beïnvloed.
- sal verdere noodslagtings op die kort termyn plaasvind, maar die aanbod sal nie drasties verhoog nie aangesien kuddes reeds uitgedun is;
- Produsentepryse op die kort termyn effens laer wees;
- aanbod oor die langtermyn ernstig onder druk wees met pryse wat bo inflasie sal styg;
- die verbruikersprys van rooivleis styg as gevolg van duurder graan- en voerpryse en die impak van verlaagde aanbod van slagbare vee, vanaf plase;
- meer jong vroulike diere (vervangingsverse) ook in die voerkrale eindig en moontlik geslag word. Dit sal op die langtermyn daartoe lei dat die kalfpersentasie en dus aanbod en prys van speenkalwers beïnvloed word; en
- graan- en voerpryse asook insetkostes drasties styg.
Die rooivleisbedryf is geïdentifiseer as een van die mees belangrikste landbou-bedrywe in die Nasionale Landbou Ontwikkelingsplan. Dit is as gevolg van die omvang van die bedryf en die feit dat 1.2 miljoen huishoudings in Suid-Afrika lewendehawe besit en afhanklik is van inkomste-sekuriteit en voedselsekuriteit.
Dit is duidelik dat die groot veeverliese wat tans ervaar word, 'n indikasie is dat tydige hulp nie verleen kon word aan die lewendehawe bedryf nie.
Die rooivleisbedryf spreek sy opregte dank uit oor die R220 miljoen wat deur die Departement bewillig is vir ramphulp, aangesien 'n onafhanklike studie getoon het dat wesentlike hulp in KwaZulu-Natal alleen, R740 miljoen sal kos. Die RPO is ook uiters bekommerd oor die dierewelsynsimplikasies wat die droogte veroorsaak.
Artikel: NWGA & RPO Eastern Cape
'Ons bring jou die nuutste Tuinroete, Klein-Karoo, Hessequa nuus'
