GEORGE NUUS - Outeniqua Kersmark vind vanjaar weer tussen 5 en 21 Desember in die NG Moederkerksaal plaas.
Hierdie is die grootste en oudste Kersmark in die Suid-Kaap en bestaan al 20 jaar.
Die mark het in 1996 in die Voortrekkersaal met ongeveer 12 uitstallers begin. Deur die 20 jaar het daar ongeveer 700 uitstallers van oor Suid-Afrika en Botswana uitgestal. Ongeveer 10 000 besoekers kom elke jaar Kersmark toe.
Die eerste paar markte het gewerk met afskeurstrokies.
Pryse is gedruk op A4 bladsye en dan deurgestik om aan die uitstallers te verskaf. Elke item het twee stokies gehad – een vir afskeur en een vir bly. Al die afgeskeurdes is tot laatnag gesorteer en sorgvuldig opgeskryf langs elke uitstaller se naam. In 2000 is alles per rekenaar gedoen en word die etikette nou deur die organiseerders gedruk.
‘n Ouditeur het intussen die boekhouding oorgeneem en alle transaksies word elektronies gedoen. Bemarking was aanvanklik tuisgemaakte plakkate wat op strategiese plekke opgesit is. Vandag word die meeste bemarking deur sosiale media gedoen.
Diens en liefdadigheidsorganisasies kry elke jaar die geleentheid om hulle 'Kerskous' inkomste by die mark aan te vul. Vir vele pensionarisse is dit hul enigste verkoopplek vir hul produkte en help dit om al die gaatjies toe te stop.
Vele studente, meestal predikantkinders, het hul sakgeld by die kersmark verdien deur as kassiere te werk.
Die allerheerlikste verversings word al vir 15 jaar deur die studente kinders in die teetuin voorsien en vanjaar is dit weer Mia se watertand lekkernye wat die monde gaan laat water.
Die afgelope paar jaar was die vrolike musiek van Carry en Trudie Caninga ‘n groot bederf.
Elke 1 000ste besoeker daagliks kry ook ‘n geskenkbewys.
Hierdie jaar is die pragtige handgemaakte kaartjies van Options, die Up with downs se keurige Kersgeskenke en skilderye van die Mond en voetskilders by die mark te sien.
Die lang besigheidsure van die mark, vanaf 9:00 tot 19:00, maak dit vir almal moontlik om die mark te besoek.
Gestremdes en bejaardes kan die mark tussen 8:00 en 9:00 en na 18:00 besoek wanneer dit minder druk is.
Vir navrae kontak Gerda Stols by 083 7728252 of stuur ‘n e-pos na [email protected].
'Ons bring jou die nuutste George, Tuinroete nuus'
