Die beste hengelaars uit 12 provinsies het meegeding om die titel van kampioenprovinsie, asook om 'n plek in die nasionale spanne te behaal.
Die eerste dag se hengel het op Boggomsbaai en Vleesbaai plaasgevind. Omstandighede was nie perfek nie, maar daar is heelwat vis gevang met hond-, hamerkop-, brons- en sandhaai asook 'n paar kabeljoue onder die vangs. Eden eindig eerste, met KwaZulu-Natal 60 punte agter hulle in die tweede plek.
Die tweede dag se hengel het vanaf Groot Brak tot Hartenbosriviermond plaasgevind. Seetoestande het die vangs negatief beïnvloed, maar hengelaars het wel daarin geslaag om verskillende haaie, hondhaaie insluitend, en eendbekrog aan te keer.
Eden het weer eens koning gekraai en gewen met 80 punte. Boland was in die tweede posisie. Hiermee rek Eden hul voorsprong tot 140 punte.
Die derde dag se hengel het die area vanaf Wildernis tot Kleinkrantz ingesluit. Met die see steeds sterk, was vangste beperk tot hond-, gespikkelde sloep-, gespikkelde skeurtand- en asook sandhaai. Kabeljou en elf was ook onder die vangs.
KwaZulu-Natal wen die dag se kompetisie met 30 punte bo die plaaslike span. Die Eden-span behou egter die voorsprong van 158 punte met KwaZulu-Natal algeheel tweede.
Boggomsbaai en Vleesbaai is waar die vierde dag se kompetisiehengel plaasgevind het.
Die see het vir die eerste keer in die week afgeplat en beter vangste is verwag. Heelwat hamerkop- en bronshaaie is gevang, asook heelwat sandhaai en 'n paar diamant- en bloupylsterte. Die vangs het ook kabeljou ingesluit.
Eden wen ook hierdie dag met 87 punte.
1. Eden 867.48
2. KwaZulu-Natal 620.94
3. Oostelike Provinsie 569.42
4. Westelike Provinsie 561.20
5. Boland 542.46
6. Sentraal Gauteng 519.38
7. Grens 452.11
8. Zululand 406.56
9. Vrystaat 351,67
10. Weskus 322.39
11. Mpumalanga 277.33
12. Gauteng Noord 191.22
Die grootste oneetbare vis was 'n diamantrog van 50kg gevang deur Rob Kyle van Kwazulu-Natal. Die grootste eetbarevis was 'n kabeljou van 10kg.
Die trofee vir die mees konstante spanprestasie, is aan Eden besorg aangesien hulle drie uit die vier dae gewen het. Eden het 'n paar plekke onder die top 10 hengelaars losgeslaan, met Hendrico Lesch in die vyfde en Willie Welman in die vierde plek. Renier Nortje is aangewys as die kampioenhengelaar met 121kg in totaal.
Vanuit die Eden-span is AJ de Beer in die Springbokspan opgeneem wat in Desember teen Namibië te staan kom. Ruaan Lesch, Hendrico Lesch,Willie Welman en Renier Nortje, almal uit die Eden-span, is gekies om die Presidentspan te verteenwoordig wat uit ses hengelaars bestaan. Floris Marais van Eden Kushengel is as die bestuurder van die span gekies.
Hierdie span sal in Jeffreysbaai tydens 'n internasionale toernooi teen spanne van Namibië, sowel as ander Suid-Afrikaanse spanne gaan meeding.
Eden Kushengel het groot sukses behaal in die onlangse Nasionale Kushengel-kampioenskappe wat hier aangebied is.
'Ons bring jou die nuutste Tuinroete, Klein Karoo, Hessequa nuus'
