SUID-KAAP NUUS - Die eerste rugbyspan van Evergreens het rede om breëbors rond te loop nadat hul Saterdagmiddag voor 'n volgepakte Outeniquapark die Groot Uitdaagbeker-kompetisie van die Suid-Westelike Distrikte ingepalm het.
Die vreugdevure het behoorlik hoog gebrand in die wenspan se kamp, want hulle het verlede seisoen met hul oorwinning van 22-16 oor Barbarians van Mosselbaai ook die titel gebuit.
Die verdedigende kampioen, wat bo-aan die punteleer met 93 punte en 'n punteverskil van (+484) geëindig het, het in die halfeindstryd vir Barbarians met 36-9 geklop.
Evergreens het in die 25ste minuut van die wedstryd 'n groot terugslag gekry toe hul kookwater-flank, Llewellyn Treurnicht, die veld weens 'n heupbesering moes verlaat het. Hy is deur Chris Kruger vervang.
Leegan Moos, (losskakel) wat altesaam 19 punte met die skoen aangeteken het, was ongetwyfeld die wenspan se beste speler. Die puntemasjien is ook as speler van die wedstryd aangewys.
Die wedstryd het in die eerste helfte redelik gelykop verloop. Progress het eerste bloed geruik toe Werner Jacobs (binnesenter) oor is vir 'n skitterende drie nadat hy omgekeerde besit bewerkstellig het.
Die mooiste drie van die dag is net voor rustyd deur die spoedvraat, Marcel Potts (linkervleuel) van Evergreens, gedruk nadat hy 'n paar spe-lers in die lig laat gryp het.
Die wenspan se plaasvervangers, Rudi Michaels (skrumskakel) en Chadley Stride (vleuel) het in die tweede helfte van die wedstryd 'n groot verskil gemaak.
Spelers van Progress wat die oog gevang het, is Fizel Fredericks (heelagter), Virgill Gysman (regtervleuel), Wendell Pondo (agtsteman), Bradley Bestenbier (vaskopstut), die slotte Shannold Mitchell en Richard Voorslag en Brians-
ton Booysen (haker).
Vir Evergreens is Potts, Michaels en Stride oor vir drieë. Die wenspan het ook 'n strafdrie gekry. Moos slaag met 2 doelskoppe en 5 strafdoele.
Jacobs en Lee-Roy Dickens (plaasvervanger-flank) het vir Progress gaan druk. Jade Roelfse (losskakel) het beide drieë verdoel en slaag ook met 4 strafdoele.
In die derde liga se eindstryd het Nico November (regtervleuel) van Progress 'n skitterende drie gedruk in sy span se oorwinning van 15-13 oor Evergreens.
November is as speler van die wedstryd aangewys. Brisslin Blom (buitesenter) is ook vir die wenspan oor vir 'n drie. Blom slaag ook met 'n doelskop en 'n strafdoel.
Evergreens het 'n strafdrie gekry. Grant Hoogbaard (losskakel) slaag met die doelskop.
Lorenzo Levack (flank) van Progress is as speler van die wedstryd aangewys.
In die Presidentsliga-eindstryd het Swellendam die Maori's in 'n spannende wedstryd met 28-21 geklop. Rustyd was die wenspan met 14-0 voor gewees.
Swellendam speel nou in die 2016-seisoen in die Premierliga.
Treslin Gertse (losskakel), wat altesaam 18 punte met die skoen aangeteken het, is as spe-ler van die wedstryd aangewys.
Maori's se blits, Edwill Rouls (linkervleuel), het die skare op hul voete gehad met die twee pragdrieë wat hy gedruk het.
Eldred James (binnesenter) is ook oor vir 'n drie. James slaag met 3 doelskoppe.
Vir Swellendam is Nolan Gertse (heelagter) en Anvar Oerson (agtsteman) oor vir drieë. Treslin Gertse (losskakel) slaag met 5 strafdoele en 'n skepdoel.
ARTIKEL: ANDRé STANDER, GEORGE HERALD KORRESPONDENT
'Ons bring jou die nuutste Tuinroete, Klein-Karoo, Hessequa nuus'
