RUGBY NUUS - Heidelberg het Saterdag 30 September in hul langverwagte tuisderby teen hul aartsvyand, Riversdal Blues, gewys dat hulle alles in die stryd sal werp om weereens 'n tuishalfeindstryd te verseker toe hulle oor Blues met 52 - 14 gestoomroller het.
Die tuisspan was rustyd met 21 - 0 voor in dié Superliga A-kragmeting, hul tweede laaste van die seisoen.
Blues, wat as gevolg van beserings van talle sleutelspelers, nie op volle sterkte was nie, kon nie die mas opkom teen Heibi se vaste vyf nie en kon hulle met die oorvloed balbesit na willekeur baljaar.
Die besoekers het egter in die tweede helfte meer doelgerig teruggekom en kon hulle darem twee keer gaan druk. Heibi het agt drieë aangeteken.
Vir Heibi het Francois Pieters (senter), met drie drieë gespog, terwyl Berthal September (heelagter), Jameson Meyers (losskakel), Lyndon Hartnick (kaptein en agsteman), Marcelino Manho (stut), en André Maxin (flank), elk een drie gaan druk het. Meyers het ook ses van die drieë verdoel.
Wilbur January van Riversdal Blues word stewig vasgevat deur Lyndon Hartnick, kaptein van Heibi.
Vir Blues het Enrique Arendse (regtervleuel), twee keer gaan druk, met Wilbur January (heelagter), wat beide drieë verdoel het.
Heibi se derde span het met 19 - 0 koning gekraai nadat hulle rustyd met 12 - 0 voorgeloop het.
Die puntemakers vir Heibi was die veteraan, Laughton Pieterzen (haker), met twee drieë en Devoroh Michaels (stut), ook met 'n drie, terwyl Veandré Carelse (heelagter), en Dimitri Stevens (plaasvervanger-losskakel) elk met een doelskop geslaag het.
Blues se tweedes het naelskraap met 16 - 15 geseëvier nadat hulle rustyd met 0 - 15 agter was.
Heibi se puntemakers was Lee-Mark Pieterse (heelagter), en Jaco Michaels (slot), elkeen met 'n drie, terwyl Germaine Hoogbaard (losskakel), met 'n straf en doelskop geslaag het.
Die puntemakers van Blues se tweede en derde spanne was nie beskikbaar nie.
Heibi se laaste ligawedstryd is tuis teen die verdedigende kampioene, Crusaders van George.
Die datum moet nog bevestig word aangesien Crusaders se deelname aan die Gold Cup-kompetisie hul ligaverpligtinge vertraag het.
Marcelino Manho, sterk stut van Heibi, probeer 'n verdediger van Riversdal Blues onderstebo loop.
Heibi se Fernell Pretorius op 'n kragtige stormlopie. Foto's: Heinrich Fortuin
‘Ons bring jou die nuutste Tuinroete, Hessequa, Karoo nuus’
