SUID-KAAP NUUS - Barbarians van Mosselbaai, wat tans die derde posisie op die punteleer van die SWD Premierliga-klubkompetisie beklee, het die krane Saterdag behoorlik oopgedraai in hul wegholoorwinning van 64-7 oor Uniondale op die D’Almeida-sportterrein.
Ruwayne Cameron (buitesenter, 3) Curshwin Mono (linkervleuel, 2), Dwane Scholtz (vaskopstut), Raymorthy du Preez (haker en kaptein, 2) en Clint Muller (plaasvervanger-linkervleuel) is oor vir drieë vir die Barbarians. Francois Smith (binnesenter) slaag met 'n doelskop, Igshaan Petersen (losskakel) met vyf doelskoppe en 'n strafdoel en Morné Buis (skrumskakel) voeg twee doelskoppe by.
Vir Uniondale is Brentley Juries (senter) oor vir 'n drie. Jessie Arends (skrumskakel) slaag met die doelskop.
Marshall Boesak, binnesenter van Silver Stars, het Saterdagmiddag twee pragdrieë in hul wedstryd teen Evergreens op die Pacaltsdorp-sportterrein gedruk.
Die wedstryd in die SWD Premierliga-klubkompetisie het met 25-25 gelykop geëindig nadat Evergreens rustyd nog met 17-13 voor was.
Stars, wat verlede week ook teen Progress gelykop gespeel het, se posisie tans op die punteleer met 22 punte en 'n punteverskil van (-75) weerspieël nie hoe goed hulle tans speel nie. Veral die Scott-broers, Nillin (heelagter) en Ashwin (buitesenter), is tans goed op stryk en kan 'n groot bydrae lewer dat hulle die verrassingspakket van die seisoen word.
Evergreens is ná 16 wedstryde die voorloper op die punteleer met 73 punte en 'n punteverskil van (+441). Rudy Michaels (skrumskakel), C-Than Moos (binnesenter) en Elton October (agtsteman) is oor vir drieë vir die tuisspan. Leegan Moos (losskakel) slaag met twee doelskoppe en twee strafdoele.
Stars se ander drie is deur Clyde Davids (regtervleuel) gedruk. Enwico Stal (skrumskakel) slaag met twee strafdoele en twee doelskoppe.
Die wedstryd tussen die tweede spanne het ook met 22 elk gelykop geëindig.Vir Evergreens is Llewellyn du Preez (buitesenter), Riaan Abrahams (flank) en Bennie Manewil (binnesenter) oor vir drieë. Grant Hoogbaard (losskakel) slaag met twee doelskoppe en 'n strafdoel.
Denwill Remas (buitesenter, 2) en Anslin Nuys (regtervleuel) is oor vir drieë vir die besoekers. Nathan Botha (binnesenter) slaag met twee doelskoppe en 'n strafdoel.
Progress het op die Rosemoor-sportterrein vier pragdrieë gedruk in hul oortuigende oorwinning van 35-13 oor Bridgton. Progress is tans nog in die tweede posisie op die punteleer met 65 punte en 'n punteverskil van (+226).
Leroy Dickens (flank), Gerin Jansen (skrumskakel) en Cheslin Jafta (buitesenter) is oor vir drieë vir die tuisspan. Fizell Fredericks (regtervleuel) slaag met twee doelskoppe en Jade Roelfse (heelagter) met 'n doelskop en drie strafdoele.
H Scott (heelagter), C Wildeman (binnesenter), C Johnson (agtsteman) en J Kapank (plaasvervanger-agterspeler) het die derde span se drieë gedruk. Scott slaag ook met 'n doelskop.
'n Strafdoel in die doodsnikke deur die oud-Arend, Jandré Blom (plaasvervanger-skrumskakel) van NMMU het Blanco op sy tuisveld met 25-22 gekelder.
Die studente het met hul volpunte oorwinning opgeskuif na die vierde posisie op die punteleer met 53 punte en 'n punteverskil van (+174).
Regardt Smit (regtervleuel), Francois Kemp (agtsteman en kaptein), Christian Willemse (losskakel) en Callum Danbar (linkervleuel), het vir die wenspan gaan druk. Willemse het ook met 'n doelskop geslaag.
Blanco se drieë is gedruk deur Ivan Kapparra (buitesenter), Ruall Beukes (vasskopstut) en hul het ook 'n strafdrie gekry. Alain Jansen (heelagter), wat aangewys is as die tuisspan se speler van die wedstryd, het met twee doelskoppe en 'n strafdoel geslaag.
Die uitslae ná die afgelope naweek se klubrugby in die SWD Premierliga is:
NMMU 25, Blanco 23; Evergreens 25, Silver Stars 25; Progress 35, Bridgton 13; Barbarians 64, Uniondale 7; Evergreens 36, NMMU 17; Blanco 30, Crusaders 28.
Blanco 29, NMMU 5; Evergreens 22, Silver Stars 22; Progress 17, Bridgton 7; Barbarians 83, Uniondale 0; Evergreens 38, NMMU 0; Crusaders 11, Blanco 8.
Blanco 34, NMMU 19; Evergreens 30, Silver Stars 20; Progress 27, Bridgton 15; Barbarians 38, Uniondale 14; Evergreens 38, NMMU 5; Crusaders 12, Blanco 8.
Prins Albert A 18, Collegians A 0; Collegians B 40, Prins Albert B 10.
22 Augustus:
NMMU t Bridgton; Evergreens t Crusaders; Silver Stars t Uniondale.
'Ons bring jou die nuutste Tuinroete, Klein-Karoo, Hessequa nuus'
