GEORGE NUUS - Twee George sportveterane, Sampie Bezuidenhout en Akker van der Merwe, was deel van 'n groep van vier van die Eden-distrik (SWD) wat deur die Wes-Kaapse departement van kultuursake en sport as sportlegendes vereer is.
Die ander twee is Joey Daniels van Mosselbaai en voormalige president van die SWD-rugbyunie en Virgil Groepe van Beaufort-Wes wat diep spore in skole - sowel as senior rugby getrap het.
Hierdie toekennings was deel van die Wes-Kaapse departement van sport se jaarlikse aksie om sportlui wat jare lange diens aan verskeie sportkodes lewer te vereer. Die eerste legendes is in 2005 vereer en tydens die tiende seremonie was dit hier-
die vier van Eden se beurt.
Bezuidenhout se atletiekloopbaan het in 1982 in George begin toe hy 'n stigterlid van Outeniqua Harriers was. Sedertdien het hy 600 weeklikse tydtoetse van die klub bygewoon en was die steunpilaar van menige byeenkomste en wedlope.
Hy het reeds 10 Twee Oseane Marathons voltooi asook 11 Comrades Ultra-marathons. In totaal het hy meer as 70 marathons voltooi waarvan 27 onder drie ure.
Behalwe padwedlope het hy ook provinsiale kleure in landloop, jukskei en rugby verwerf. Hy speel ook aktief rolbal.
Akker van der Merwe het geen bekend-stelling in rolbal in Suid-Afrika nodig nie.
Daarna kon niks hom keer nie en het hy feitlik alle titels op klub- en provinsiale vlak gewen.
Hy het onder andere Suid-Kaap by 28 geleenthede op die rolbalbaan verteenwoordig en ook verskeie titels op nasio-nale vlak ingepalm.
As administrateur het hy ook sy merk gemaak deur beide die George-rolbalklub en Suid-Kaap-rolbal as president te verteenwoordig. Hy het die sport ook in vele ander hoedanighede gedien en is in 2004 en 2010 met lewenslange ere-lidmaatskap vereer.
In weerwil van heupvervangings en ander gesondheidsprobleme wat hy te bowe moes kom, speel hy vandag nog kompeterende rolbal en is 'n opponent om mee rekening te hou.
Alhoewel hy bekendheid verwerf het as rugby-administrateur op beide klub- en provinsiale vlak het Joey Daniels ook sy merk gemaak op krieket- en atletiek gebied.
In 1973 was hy die WP se hoogspring kampioen en het in dieselfde jaar die besondere prestasie behaal om die magiese 2m-merk te bereik.
Groepe was vir 40 jaar aktief by rugby betrokke en het die sport as afrigter en skeidsregter gedien by elke skool waar hy as onderwyser betrokke was.
Hy het die destydse Proteas rugbyspan in 1971 en 1972 onderskeidelik op toere in Brittanje en Holland verteenwoordig en het na sy uittrede as speler homself as administrateur onderskei. Hy het tussen 2009 en 2011 op die uitvoerende bestuur van die SWD-rugbyunie as verteenwoordiger van die Karoo-streek gedien.
Die Eden-distrik se sport-dissipels wat deur die Wes-Kaapse departement van kultuursake en sport as sportlegendes vereer is. Van links: Virgil Groepe, Joey Daniels, Sampie Bezuidenhout en Akker van der Merwe.
'Ons bring jou die nuutste George, Tuinroete nuus'
