RIVERSDAL NUUS - Die tweede helfte van die 2014/2015 jukskeiseisoen is verlede Saterdag op Riversdal van stapel gestuur.
Vanweë die aanvang van die nuwe skooljaar was die skoolleerders wat jukskei speel se verteenwoordiging aan die skraal kant.
Spelers wat wel opgedaag het, moes ‘n hittegraad van 35°C trotseer. Die kraaie het behoorlik gegaap.
Desembervakansies is ‘n tyd van rus en niksdoen en dit het duidelik deurgeskemer in die gehalte van die jukskei wat gegooi is. Die stuiptrekkings van die vakansiegees was beslis sigbaar, veral wat afrondingshoue ten opsigte van lê’s en wegpenne aanbetref kon die deurslaggewende houe nie in reëlmaat gegooi word nie.
In die A–afdeling was George en Hartenbos weereens die toonaangewende spanne. George het egter deur die loop van die dag voldoende punte opgestapel om sodoende die A-afdeling gerieflik met ‘n voorsprong van 11 ½ punte te wen (53 ½ teenoor 42 van Hartenbos). Tog het Hartenbos in die laaste wedstryd van die dag George met (8-7) geklop.
In die B-afdeling het Riversdal sy plek gereserveer en wen klokslag met goeie deurslaggewende jukskei. Hulle behaal die eerste plek (41 ½ ) punte, met Hartenbos B1 in die tweede plek met 31 punte. Die C-afdeling is egter deur Hartenbos ingepalm. Dit wil voorkom of Hartenbos C klokslag wen en hulle gevestig het as die beste C-span in die Eden Distrik sover dit jukskei aanbetref.
Ondanks die uitputtende hitte, het dit nooit die spelers aan toewyding en oorgawe ontbreek nie. Die finale puntestand is soos volg: A-afdeling - George (53 ½ ), Hartenbos (42); B-afdeling - Riversdal (41 ½ ), Hartenbos B1 (31), Hartenbos B2 (29 ½ ), George (27 ½); C-afdeling - Hartenbos (25 ½), Riversdal C1 (22), Riversdal C2 (22), George (20 ½).
MP Prinsloo-toernooi
Op 7 Februarie vind die jaarlikse MP Prinsloo-jukskeitoernooi op Beaufort-Wes plaas. Spanne uit die Wes-, Suid-, en Oos-Kaap neem normaalweg hieraan deel. Vanjaar word verteenwoordigende spanne uit die Noord-Kaap, Vrystaat en Gauteng verwag om deel te neem. Volgens verwagting behoort ‘n baie mededingende kompetisie plaas te vind.
Die Eden Distrik se spanne is soos volg:
A-span: Jan van Dyk, Louis Badenhorst, Sydney Stopforth, Rian van der Walt.B-span: Arina Steyn, André La Grange, Dolf Barnard, Henry Gerber.
C-span: Etienne Gerber, Erica Snyman, Johnny Coetzee, Amoré Slabbert.
D-span: Salie Gerber, Theane Badenhorst, Malie Pienaar, Piet Victor.
E-span: Dons Pienaar, Giepie van Rensburg, Johane Jórdan, Duimpie van Zyl.
F-span: Annamarie van Staden, Shanel Homveld, Trudie Olivier, Ruhan van Staden.
Reserwes: Sharnel en Jerika.
Die opening vind reeds om 07:00 plaas en spelers word versoek om in die Eden-distrikkleure geklee te wees.
'Ons bring jou die nuutste Tuinroete, Klein-Karoo nuus'
