GEORGE NUUS - Die 28-jarige padatleet, Lloyd Bosman van Nedbank SWD, was Saterdagoggend die groot aantrekkingskrag by die Sportcentre-padwedlope wat by Van Kervel-skool in George plaasgevind het.
Die bekende atleet het getoon dat hy volkome van sy beserings herstel het toe hy die 10 km vir ope-mans in 'n blitstyd van (29:59) gewen het.
"Dit was baie lekker om in sulke goeie weer te hardloop. Ek is in my noppies dat ek weer die wedloop onder die 30 minute kon voltooi. Ons kan Sportcentre bedank wat as borg opgetree het. George verkeer en roete aanwysers het ook hul deel bygedra dat die wedlope so 'n groot sukses was," het Bosman na die wedloop aan die George Herald gesê.
Die wedlope, wat deur Nedbank SWD aangebied is, het 320 atlete gelok.
Die Nedbank SWD-atlete, Melissa van Rensburg (38:51) en veteraan Lana Theunissen (40:02) het die ope-vroue afdeling oorheers. Die veteraan van Knysna-marathonklub Liesl Grobler (41:06), was derde oor die wenstreep. Die 3 km-pretdraf vir ope-mans is ingepalm deur die 17-jarige Jason Langeveldt, 'n leerder by Van Kervel, wat in die kleure van Nedbank SWD deelneem, Francois du Toit van Grasshopper Outeniqua Harriers en die 18-jarige Jeffrey Stefaans, ook 'n leerder by Van Kervel.
Die 17-jarige Chiné Geldenhuis, 'n
gr. 11-leerder by York High, die 13-jarige Cara Bergh, 'n gr. 7-leerder by Laerskool George-Suid, en die 9-jarige Mckaylla Pypers, 'n gr. 4-leerder van Laerskool George-Suid, het die ope-vroue afdeling gewen.
- Ope-mans: 1. Lloyd Bosman (29:59), 2. Godwin Heyns (31:53), 3. Elfonzo Pieterse (33:01).
- Juniors: 1. Godwin Heyns (31:53), 2. Dullan Solomons (33:27).
- Veterane: 1. Mxolise Fana (34:51), 2. Mauritz Janse van Rensburg (35:50) beide Outeniqua Harriers.
- Meesters: 1. Phillipis du Toit, Hartenbos Drawwers (39:03), 2. Samuel Windvogel, Outeniqua Harriers (41:25).
- Grootmeester: 1. Jan du Toit, Hartenbos Drawwers (46:00), 2. Trevor van Rensburg, Sedgefield Striders (53:38)
- Stapper: 1. Elwich van Wyk, Outeniqua Harriers (49:48), 2. Johan Nieman, Nedbank SWD (1:08.31)
- Ope-vroue: 1. Melissa van Rensburg (38:51), 2. Lana Theunissen (40:02), 3. Liesl Grobler Knysna-marathonklub (41:06)
- Junior: 1. Frances Herholdt (43:57), 2. Zanelle Vorster (54:10), 3. Zhane Vorster (54:10).
- Veteraan: 1. Lana Theunissen, Nedbank SWD (40:02), 2. Liesl Grobler, Knysna-marathonklub (41:06)
- Meester: 1. Annatjie Botes, Nedbank SWD (42:50), 2. Agnus Nieburg, P E Profiles (47:54).
- Grootmeester: 1. Mariette de Haan, Nedbank SWD (1:00.00), 2. Jane Mouton, Cape Multi Sport (1:09.31)
- Groot-grootmeester: 1. Anne-Marie van Eck (1:10.42), 2. Lisetta Visagie (1:17.05) beide Nedbank SWD.
- Stapper: 1. Nolene van Rensburg, (55:28), 2. Morné Geldenhuys (1:00.03) beide Outeniqua Harriers.
Jason Langeveldt (middel), links Francois du Toit van Grasshopper Outeniqua Harriers, tweede en Jeffrey Stefaans derde. Foto's: André Stander
'Ons bring jou die nuutste George, Tuinroete nuus'
