GEORGE NUUS - Die George-stadsraad het besluit om 'n tenderproses te volg om 'n nuwe diensverskaffer aan te stel vir die bestuur van die Rosemoor-dienssentrum en akkommodasie-eenhede vir bejaardes.
Die munisipaliteit se huurkontrak met die huidige bestuursliggaam, die Rosemoor-dienssentrum vir bejaardes, 'n nie-winsgewende organisasie (NWO), het op 31 Maart verstryk. Die munisipaliteit is die eienaar van die perseel in Attaquastraat.
Volgens Henriëtte Koch, wat as direkteur vir menslike nedersettings, beplanning en ontwikkeling waargeneem het, is 'n verslag in April by 'n spesiale raadsvergadering ingedien, waar besluit is om die huurkontrak op 'n maand-tot-maand basis voort te sit totdat die munisipaliteit die nuwe aanstellingsproses voltooi het.
In reaksie op bewerings van bestuursprobleme onder die huidige bestuur, het Koch gesê: "Die huidige uitdagings spruit hoofsaaklik uit interne bestuurskwessies binne die NWO, insluitend geskille oor bestuursaanstellings en lede se bewustheid van grondwetlike bepalings.
"Baie inwoners was onbewus daarvan dat slegs opbetaalde NWO-lede mag deelneem aan vergaderings, klagtes mag indien of bestuursbesluite mag beïnvloed."
Sy het gesê die verkrygingsproses vir 'n nuwe NWO sal binnekort afskop.
"Die huidige bestuursorganisasie is welkom om 'n voorstel in te dien. Inwoners het ook belangstelling getoon om hul eie NWO te stig om die sentrum te bestuur, wat oorweeg sal word gegrond op dieselfde tenderproses."
Die Rosemoor-dienssentrum vir bejaardes het 'n bestuurspan wat verantwoordelik is vir daaglikse bedrywighede, en 'n bestuursraad waarop inwonersverteenwoordigers, professionele persone en eksterne adviseurs dien.
Koch het bevestig dat die huidige voorsitter in sy pos aanbly.
"Die munisipaliteit het hom daartoe verbind om toesig te hou deur gereelde terreinbesoeke, vergaderings en deur ondersteuning te bied deur middel van werk- en inligtingsessies om beide inwoners en die NWO te help om hul onderskeie rolle en verantwoordelikhede te verstaan."
Dr. Henry McCombi. Foto: Michelle Pienaar
Die NWO se hoof- uitvoerende beampte, dr. Henry McCombi, het gesê dat hulle op die oggend van 31 Maart in kennis gestel is dat hulle die perseel moet verlaat.
"Die kontrak met die munisipaliteit dateer van lank gelede en ons was onder die indruk dat dit ons diensleweringskontrak was wat verval het, nie die huurkontrak nie.
"Ná gesprekke met die munisipaliteit is daar egter ooreengekom dat die huur op 'n maand-tot-maand basis sal voortgaan totdat die tenderproses afgehandel is.
"Ons is tevrede dat ons 'n regverdige kans het om deel te neem aan die tender. Indien ons onsuksesvol is en moet ontruim, gaan ons nie ons dienste staak nie, maar uitbrei na bejaardes in die gemeenskap in die algemeen."
‘We bring you the latest Garden Route, Hessequa, Karoo news’
