Tandarts in hof oor kinder-pasiënte, kry borgtog

GEORGE NUUS - Die berugte George-tandarts, dr. Ian Venter (45) het gistermiddag, Woensdag 24 Mei, in die George-hof verskyn nadat hy Maandagoggend by sy praktyk op die hoek van Courtenay- en Mitchellstraat in die middedorp in hegtenis geneem is.

Venter, wat 'n vier jaar vonnis van korrektiewe toesig uitdien, word aangekla van minagting van die hof nadat dit aan die lig gekom het dat hy steeds kinders behandel. Landdros Les Strydom het borgtog van R5 000 aan Venter toegestaan. Strydom het gesê 'n borgaansoek gaan nie oor skuld nie en dat Venter nie 'n vlugrisiko is nie.

Hy is in November 2014 gevonnis nadat hy skuldig bevind is op 'n seksklag waarby 'n minderjarige seun, toe 15 jaar oud, betrokke was.

Streeklanddros Eugenia Jacobs het toe gelas dat Venter se naam in die nasionale register vir seksoortreders opgeneem word en hy daarom nie met kinders, of in die omgewing van kinders, mag werk nie.

Venter het gister getuig dat hy verbaas en geskok was toe die polisie hom in hegtenis geneem het. Hy voer aan dat hy nie geweet het dat hy nie met kinders mag werk nie. Hy het gesê na sy vonnis in 2014 het hy nie kinders behandel nie, maar na vier maande het sy prokureur Braam Swart hom ingelig dat hy wel kinders in die teenwoordigheid van hul ouers mag behandel.

Die staatsaanklaer, Reinet de Waal, het egter gesê streeklanddros Eugenia Jacobs was baie duidelik in haar uitspraak dat Venter nie met kinders mag werk nie. Sy het dit aan hom gestel hy nie by die voorwaardes van sy korrektiewe toesig hou nie en 'maak soos hy lus het'.

De Waal het aan Venter gesê dat hy die geen-alkohol reël nie streng toepas nie en dat hy hom ook nie van enige misdaad weerhou nie, want hy is vyf maande na sy vonnis aangekeer vir 'n beweerde voorval van molestering wat tans verhoor word.

Venter het gesê dat hy 'n paar keer drankwinkels besoek het om sigarette te koop.

NVG

Eric Ntabazalila, provinsiale woordvoerder van die nasionale vervolgingsgesag (NVG), sê hulle het reeds in Maart 'n klag teen Venter ingedien na verskeie inskrywings op Facebook verskyn het dat hy minderjarige pasiënte behandel.

"'n Verklaring is ook van 'n ma wie se kind deur die beskuldigde behandel is, verkry om die lasbrief te bekom en die arrestasie uit te voer," het Ntabazalila gesê.

Kapt. Malcolm Pojie, die Suid-Kaapse polisiewoordvoerder, sê beamptes van die plaaslike gesinsgeweld, kinderbeskerming en seksuele misdrywe-eenheid (GKS) het Maandag op dokumentasie en ‘n rekenaar beslag gelê.

Gevolge vir ouers

Lede van die Women and Men Against Child Abuse (WMACA) het gister se hofverrigtinge bygewoon. "Ouers moet bewus gemaak word dat as jy jou kinders na dr. Ian Venter neem, jy oop is vir vervolging," het Joanne Barrett, WMACA-woordvoerder gesê. sy was teleurgesteld dat die hof borgtog toegestaan het.

Ntabazalila gesê die NVG oorweeg nie enige optrede teen ouers nie, maar meen dit is belangrik dat hulle weet dat daar wel gevolge kan wees.

Kommentaar van die departement korrektiewe dienste oor hoe Venter se arrestasie sy korrektiewe toesig voorwaardes beïnvloed, word verwag.

Sodra kommentaar ontvang word, sal dit in 'n opvolgberig saam met meer oor die borgaansoek by www.georgeherald.com geplaas word.

• Venter verskyn weer op 9 Junie in die hof in verband met 'n molesteringsaak wat na bewering op 11 April 2015 by sy huis in Heroldsbaai plaasgevind het. Hy was onder korrektiewe toesig ten tyde van die 2015-voorval. 'n Seun (13) beweer Venter het hom seksueel betas toe hy by sy huis oornag het. Venter ontken skuld.

Klik hier vir vorige artikels: