GEORGE NUUS - Dit was ’n besige naweek vir nooddienste in George.
Minstens agt motorongelukke het Vrydag en Saterdag, 28 en 29 Augustus, in onder meer Pacaltsdorp, Blanco, Kleinkranz, Rooirivierrif en Thembalethu plaasgevind.
Geen ernstige beserings of sterftes is aangemeld nie.
Die voorvalle het gewissel van botsings tussen voertuie tot ’n voertuig wat aan die brand geslaan het en voertuie wat deur mure gery het.
Vrydag omstreeks 18:50 het ’n voertuig op die R102 naby George-lughawe aan die brand geslaan. Die brand is deur brandbestryders geblus. Die oorsaak van die brand was nie onmiddellik bekend nie.
Later dié aand, omstreeks 19:14, was ’n motor en motorfiets in ’n ongeluk in Kleinkranz betrokke.
Verskeie voorvalle is ook op Saterdag aangemeld.
Omstreeks 10:15 is ’n ongeluk in Hoopstraat aangemeld. Teen ongeveer 17:00 het ’n Mercedes in Rooirivierrif deur ’n tuinmuur gery en rondom 20:00 was twee voertuie in ’n trompop botsing in Beach Road, Pacaltsdorp, betrokke. Altesaam vyf mense was in die twee voertuie.
Volgens die Suid-Kaapse polisiewoordvoerder, adjudant-offisier Chris Spies, is ’n 41-jarige vrou op ’n aanklag van bestuur onder die invloed van drank in hegtenis geneem. Sy is later vrygelaat en sal na verwagting in die hof verskyn sodra sy formeel aangekla is.
Omstreeks 21:40 Saterdagaand was ’n taxi van Thembalethu en ’n motor in nog ’n botsing betrokke.
Twee verdere ongelukke is later dié aand aangemeld.
Omstreeks 23:20 was ’n bakkie en ’n BMW in ’n ongeluk in Pacaltsdorp betrokke, terwyl ’n voertuig omstreeks 23:57 in Blanco ook deur ’n tuinmuur gery het.
Nooddienste op die toneel in Pacaltsdorp.
‘Ons bring jou die nuutste Tuinroete, Hessequa, Karoo nuus’
