GEORGE NUUS - Die bejaarde vrou wat vroeër vanmiddag in Courtenaystraat oorkant die Precap-sentrum raakgery is toe sy die pad probeer oorsteek het, word tans in die George MediClinic vir skraapwonde en ‘n moontlike gebreekte vinger behandel.
Die voorval het net voor 13:00 in die straat voor die Family Pick n Pay plaasgevind.
Lesley Wellington (69) was onderweg om middagete te geniet, toe sy deur ‘n wit Polo Volkswagen van die Wes-Kaapse Regering op ‘n eiland in Courtenaystraat raakgery is. Die bestuurder van die Polo het die parkeerplek aan die agterkant van die sentrum verlaat en was besig om regs te draai in Courtenaystraat toe die ongeluk plaasgevind het. Volgens die padreëls is dit onwettig om daar regs te draai.
Volgens ‘n ooggetuie, Rozanne Olivier, het sy gehoor hoe die vrou ‘n kreet gee. “Die bestuurder het dadelik uitgeklim en die tannie gehelp om op die enjinkap van die motor te sit. Die tannie het iemand gebel en baie gehuil. Sy was duidelik geskok,” het sy gesê.
Wellington se dogter, Louise Leggatt, het aan die George Herald gesê dat hulle nie ‘n klag wil lê nie. Die man het diep berou getoon en was baie hulpvaardig,” het Leggat gesê. “Dit was duidelik net ‘n ongeluk.”
Met die George Herald se aankoms op die toneel het die bestuurder van die voertuig ontken dat hy ‘n ongeluk gesien het of self daarby betrokke was. Hy was ontsteld toe ‘n foto van sy registrasienommer geneem is.
Klik hier vir vorige nuusflitse:
ARTIKEL: MICHELLE PIENAAR, GEORGE HERALD-JOERNALIS
'Ons bring jou die nuutste George, Tuinroete nuus'
