Man vas vir Powertown-moorde

GROOT-BRAKRIVIER NUUS - Die ondersoekbeampte wat die moorde van twee jong meisies in Powertown ondersoek, het vanoggend ‘n deurbraak in die saak gemaak toe hy ‘n verdagte gearresteer het.

Die borgaansoek van ‘n 22-jarige man van Powertown wat vanoggend in die Streekhof verskyn het op ‘n aanklag van verkragting van ‘n 11-jarige kind, is deur die verdediging laat vaar nadat die ondersoekbeampte van die Mosselbaai-polisie, kaptein Tekkie van Rensburg, die verdagte in die aanhoudingselle by die hof ook van moord aangekla het.

Kaptein Van Rensburg het bevestig dat klagtes van moord, verkragting en menseroof teen dié verdagte gebring is. Hy het voorts bevestig dat die moontlikheid ondersoek word dat hierdie verdagte ook met die ander onlangse voorvalle van moord op jong meiseis in Powertown verbind mag word.

Die ondersoekbeampte in die verkragtingsaak van die 11-jarige kind waarop die verdagte in die streekhof tereg gestaan het, is adjudant offisier Alistair Rezant van die Mosselbaai GKS-eenheid.

Die verdagte het daarna in die distrikshof op ‘n klag van moord, verkragting en menseroof verskyn. Die saak is egter tot 22 Julie uitgestel vir ‘n geskikte hooggeregshofdatum.

Die bykomende klagtes hou verband met die moord van die 17-jarige Lesley-Ann Maya van Powetown, wie se liggaam op 18 April 2015 tussen riete skaars 300 m van haar huis gevind is. Lesley-Ann was 5 dae vermis voordat op haar oorskot afgekom is.

In Junie 2015 is nog ‘n meisie, die 15-jarige Bonique Jansen, as vermis aangegee. Haar liggaam is 9 dae later duskant Powertown gevind.