GEORGE NUUS - George-munisipaliteit is besig met die laaste afrondings vir die jaarlikse Liggiefees op 5 Desember by Eenheidspark, waartydens die kersliggies in George se strate om 20:00 aangeskakel sal word.
Soos gebruiklik, word voorkeur gegee aan plaaslike stalletjie-eienaars en kunstenaars. Die organiseerders verwag weereens ‘n groot opkoms na hierdie jaarlikse fees wat gratis vir die hele gemeenskap aangebied word.
Die Uitvoerende Burgermeester van George, Charles Standers het benadruk dat George “oor voldoende talentvolle kunstenaars en stalletjie-eienaars beskik om ‘n suksesvolle fees uit sy eie mense vir sy eie mense te kan aanbied.” Oudisie-geleenthede was oor die afgelope twee jaar vir kunstenaars in al die gemeenskappe gehou om vars talent vir optredes op die feesverhoog te identifiseer. Vanjaar word daar nie weer oudisies gehou nie en word die program saamgestel uit die beste optredes van die afgelope twee Liggiefeeste.
Die fees vind soos gebruiklik by Eenheidspark aan die bopunt van Yorkstraat plaas. ‘n Verskeidenheid stalletjies, vermaak en optredes vir die hele gesin sal vanaf 14:00 tot 22:00 op die feesterrein aangebied word.
Die middagprogram bied vermaak aan kinders en skoliere met springkastele en verskeie ander verrassings.
Jeuggroepe en jong kunstenaars sal tydens die middag geleentheid kry om hul talent op die verhoog ten toon te stel.
Gedurende die aandprogram sal besoekers vermaak word deur volwasse en professionele kunstenaars.
Ongeveer 10 000 feesgangers word by die fees verwag. Die veiligheid van feesgangers is dus hoog op die agenda.
Die munisipale bestuurder, Mnr. Trevor Botha, verseker die inwoners van George dat “behoorlike voorbereidings agter die skerms plaasvind om sigbare polisiëring te verskaf.”
Hy maan ook motoriste en besighede wat deur die straatsluitings geraak word, om geduldig te wees en aflewerings vooraf te reël, of alternatiewe roetes te gebruik. Die boonste deel van Yorkstraat tussen Courtenay- en Hiberniastraat sal gesluit wees vanaf 10:00 Saterdagoggend tot 01:00 Sondagoggend. Die roetes wat motoriste kan volg word op die padkaart hiernaas aangedui.
Na afloop van die Burgemeesterstrofee Rugby 7’s sal die Pacaltsdorp-blaasorkes ‘n feestelike optog vir rugby-ondersteuners en lede van die publiek begelei vanaf Outeniquapark, met Langenhovenweg af tot by Eenheidspark om by die Liggiefees aan te sluit.
Stalletjies aan die weerskante van Yorkstraat sal eet- en drinkgoed verkoop. Die fees is ook ‘n goeie geleentheid om kersgeskenke en items vir die kersboom teen billike pryse te koop.
Volgens Pieter Pepler, die fees-organiseerder, is die aansoeklys vir die stalletjies reeds gesluit en die program van kunstenaars gefinaliseer. Op hierdie stadium word die laaste afrondingswerk aan die reëlings gedoen.
Die boonste deel van Yorkstraat tussen Courtenay- en Hiberniastraat sal gesluit wees vanaf 10:00 Saterdagoggend tot 01:00 Sondagoggend.
'Ons bring jou die nuutste George, Tuinroete nuus'
