_20430.JPG)
GEORGE NUUS - ‘n Web-ontwerper en swemafrigter van hier het pas teruggekeer van die Griekse eiland, Lesbos, waar hy vir tien dae gehelp het om Siriese vlugtelinge aan wal te bring.
Erik Greyvenstein het ‘n paar stories en beelde van hierdie skokkende wêreldkrisis gedeel tydens ‘n onderhoud Dinsdagoggend met die George Herald.
Vir Erik en sy vrou, Marguerite, is sendingwerk ‘n manier van leef. Hy het as driejarige kleuter reeds sy ouers gehelp om Christen literatuur in Hong-Kong se strate uit te deel, en sy vrou ontmoet tydens ‘n Bybelseminaar in Bethlehem, in die Vrystaat.
Beide is lede van die internasionale instituut University of the Nations, en nou betrokke by hul opleidingsarm YWAM (Youth With A Mission).
Plaaslik is die egpaar lidmate van die Shofar-gemeente, wat met die hulp van finansiële vennote "Jesus se werk" regoor die wêreld neem.
Erik het na vele gebede geroepe gevoel om die Siriese vlugtelinge te help. "Ons volg ons harte en het die Here gevra om ons te gebruik waar ons die grootste impak kan maak," het hy gesê.
"Van ‘n Christen se oogpunt is dit ‘n massiewe geleentheid om ‘n verskil te maak." Die vlugtelinge is meesal Moslems, wat na oorwegend Christen georiënteerde lande vlug. Om te doen "wat Jesus sou doen" is vir Erik baie belangrik.
"Die Siriërs is amazing mense," het hy vertel. "Hulle is mooi, ordentlik en professioneel. Hulle kan nog ‘n hengse bydrae tot enige samelewing lewer." Sowat 85% van die vlugtelinge wat van Turkye na Griekeland met rubberbootjies vlug, is Siriërs.
‘n Handjievol kom van Afghanistan en Somalië. Gedurende sy verblyf op Lesbos het rubberbootjies enige tyd van die dag of nag daar aangekom, volgepak met vlugtelinge - babas, kinders, en baie jong mense. Die meeste vlugtelinge is tussen die ouderdomme van 18 en 30. Baie families maak die tog oor die see mee, volgens Erik.
Wat hy altyd sal onthou is die mense se gesigte wanneer hulle boot die eiland bereik. "Dit is ‘n mengsel van trauma, skok, verligting - soveel emosies. ‘n Mens het geen idee waardeur hierdie mense alles moes gaan nie. Dit is ‘n baie traumatise ervaring," het Erik gesê.
Een vrou het vir hom drie dadels gegee uit dankbaarheid vir sy hulp. ‘n Ander man het hom vasgehou, gedruk en gesoen. Hy kon hom nie los nie. Erik het eenkeer self twee bote sien aankom na die eiland, terwyl slegs hy daar was om te help.
Erik was die enigste Suid-Afrikaner wat op daardie tydstip gehelp het. Heelwat Europese nie-regeringsorganisasies het saam met hom gewerk. "Ek sal graag wil teruggaan en werk in die vlugtelingkamp Zataari, in Jordanië, waar 650 000 vlugtelinge gehuisves word," het Erik laat blyk.
• Om 'n praatjie by te woon waar Erik meer vertel oor sy ondervinding, stuur 'n e-pos na erikpfg@gmail.com.
Kyk hier onder na 'n video van 'n nagredding wat Erik meegemaak het:
Kyk hier onder na 'n video-onderhoud met Erik:
Video: Michelle Pienaar.
_68610.jpg)
'n Rubberbootjie vol Siriese vlugtelinge kom aan by die eiland Lesbos. Foto: Erik Greyvenstein
_27356.jpg)
Erik en sy Siriese vriend Lookman, 'n grafiese ontwerper van Damaskus. Foto: Verskaf
Uit die mond van die vlugteling:
- Hoe meer 'n vlugteling betaal, hoe veiliger is die reis.
- Vlugtelinge bestuur hul eie rubberboot. 'n Kaptein word aangestel oomblikke voor hul vertrek. Die persoon word gewys hoe die stuur werk, en moet glo net hul oog hou op die liggie (Lesbos) in die verte.
- Vlugtelinge word soms met die dood gedreig as hulle te bang is om die tog in onstui-mige water mee te maak.
- Wanneer die Griekse kuspatrollie vlugtelinge met vuurwapens dreig om hul bootjie om te draai, en terug te beweeg na Turkye, neem hulle 'n selfoonvideo.
- Die patrollie los hulle dan gewoonlik uit, want hulle wil nie in die nuus verskyn waar hulle wapens op vlugtelinge rig nie.
- Dit kos sowat R40 000 vir 'n gesin van vier om met 'n bootjie te vlug. Hulle wag soms dae in 'n skeepsvraghouer voordat hulle binne minute op 'n boot moet klim. Die smokkelaars bepaal wanneer 'n boot kan vertrek.
- Die helfte van Sirië (11 miljoen mense) het reeds uit die land gevlug.
- Die reddingsbaadjies wat vlugtelinge dra word in Turkye vervaardig vir $2 'n baadjie. Dit is onveilig en van geen waarde as 'n kind in die water sou beland nie.
ARTIKEL: MICHELLE PIENAAR, GEORGE HERALD - JOERNALIS
'Ons bring jou die nuutste George, Tuinroete nuus'
