Droogte in Suid-Kaap 'n ramp

SUID-KAAP NUUS - Die heersende droogte in die Klein- en Groot-Karoo is besig om sy tol te eis, met damme se watervlakke wat ver onder die 10% gedaal het.

Die Gamkapoortdam in die Calitzdorp-, Ladismith-omgewing is leeg. James-Brent Styan, woordvoerder vir die Wes-Kaapse ministerie van plaaslike regering, omgewingsake en ontwikkelingsbeplanning het Dinsdag 4 April die erns van die droogte bevestig toe hy in 'n persverklaring gesê het: "Die gemiddelde damvlakke in die Wes-Kaap staan op 25% en met vyf van die provinsie se munisipaliteite wat reeds as droogte-rampgebiede verklaar is, word oorweging daaraan geskenk om nóg sewe by die lys te voeg.

Hy het gesê dat Hessequa-, Kannaland-, Knysna-, Bitou en Oudtshoorn-munisipaliteite van die Eden-distrik droogtegebiede is om by die lys gevoeg te word.

Damvlakke deurgegee soos op Woensdag 29 Maart skilder 'n donker prentjie. In die Oudtshoorn-omgewing staan die Kammanasiedam se watervlak op 6,4%. Buite De Rust is verlede week slegs 5,8% water in die Stompdriftdam gemeet, terwyl die Oukloofdam naby Prins Albert slegs 5,5% water in het en dit verminder by die dag.

Tussen Prins Albert en Laingsburg is daar slegs 5,1% water in die Floriskraaldam. Die Calitzdorpdam het met die laaste lesing 'n 34% watervlak getoon, maar slegs ses weke gelede was dié dam nog 47,8% vol. Op dieselfde tydstip 'n jaar gelede was die Calitzdorpdam 92,2% vol. Oudtshoorn se hoof opgaardam, die Raubenheimerdam staan tans op 54%.

Die munisipaliteite reeds op die droogtelys, is volgens Styan - Sentraal-Karoo, Weskus, Witzenberg en Prins Albert.

Die Akkerkloofdam buite Knysna is net minder as 40% vol. Hoewel damme aan die see se kant van die Outeniquaberge voller is as in die Karoo-kant, het ses van die damme daar drastiese dalings in watervlakke oor die laaste paar weke getoon.

Hulle sluit in (dam, area, damvlak op 29 Maart, damvlak dieselfde tyd verlede jaar):
• Roodefonteindam, Plettenbergbaai, 70%, 98,4%.
• Tuinroetedam, George, 76%, 96,7%.
• Duiwenshokdam, Groot-Brakrivier, 87%, 100,2%.
• Ernest Robertsondam, 86%, 97,6%.

• Hartbeeskuildam, Hartenbos / Mosselbaai, 31%, 73,3%.

Riviere wat bovermelde damme moet vul loop droog, of is in meeste gevalle reeds opgedroog. Hierdie riviere sluit in die Piesangrivier (Roodefonteindam), Swartrivier (Tuinroetedam), Kammanasierivier (Kammanasiedam), Olifantsrivier (Stompdriftdam), Kordiersrivier (Oukloofdam), Nelsrivier (Calitzdorpdam), Gamkarivier (Gamkapoortdam), Buffelsrivier (Floriskraaldam), Duiwenshokrivier (Duiwenshokdam), Groot-Brakrivier (Ernest Robertsondam en Wolwedansdam) en Hartenbosrivier (Hartbeeskuildam).

Die Suid-Afrikaanse weerburo in Kaapstad se Micheal Barnes sê op volgens hul langtermyn-voorspelling lyk dinge nie te sleg wat verwagte reënval aanbetref nie. "Vanaf April tot Augustus verwag ons normale en bo-normale reënval vir die omgewing."

Wat onmiddellike reënval vir Oudtshoorn en omgewing aanbetref sê Barnes daar is 'n 30% kans op reën en donderstorms vir die komende naweek, "maar nie van so aard dat dit die damvlakke gaan verhoog nie."

Damme in die Karoo, Klein-Karoo, Kannaland en Tuinroete-omgewing. Foto: Wes-Kaapse regering webtuiste