GEORGE NUUS - Diefstal, inbrake by huise en 'n gewapende rooftog het verlede week hoogty gevier in Merrimanstraat, George-Suid.
In die ergste voorval verlede Dinsdagaand (7 April) is 'n Chinese-egpaar in die parkeerarea voor hul woonstel in die Kroon Arend Park sekerheidskompleks in Merrimanstraat deur drie mans met 'n vuurwapen gedreig. Hulle is van kontant en selfone beroof.
'n Mede-inwoner het die vrou hoor gil en die polisie geskakel, maar kon nie deurkom na die 10111-noodnommer nie en moes minstens 10 minute wag voor die operateur by die George-beheerkamer opgetel het. Die inwoner het na die verdagtes geroep wat doodluiters die kompleks deur die ingangshek in Merrimanstraat verlaat het.
Volgens 'n ander inwoner is hierdie die tweede insident in tien dae.
"Niemand is beseer nie en ons ondersoek 'n saak van gewapende roof," het Esterhuyse gesê.
Dieselfde aand kort na die gewapende roof het sekerheidsbeamptes van Optima Sekuriteit drie mans aangekeer nadat hulle by een van die woonstelle ingebreek het. Hulle het rugsakke met drank en sigarette in hul besit gehad. Dié drie mans kon egter nie met die gewapende roof verbind word nie.
In nog voorvalle in die straat verlede week het inwoners vertel dat boewe hul erwe binnegekom en verskeie items gesteel het. Verdagtes is ook betrap terwyl hulle deur vensters loer, maar die huiseienaars het hulle verjaag. Nie al die voorvalle is by die polisie aangemeld nie.
Die polisie het inwoners gevra om alle voorvalle aan te meld en verdagte persone wat in die woonbuurt rondloop te rapporteer.
Inwoners word ook versoek om hul waardevolle items te bêre en nie in sig van diewe te laat nie.
• George-Suid sektorbevelvoerder - Kaptein R. Stripp - 079 893 9991
• Radiobeheer - 044 803 4732/3
• Operasionele kamer - 044 803 4578
• Dienssentrum - 044 803 4744
• Crime Stop - 08600 10111
ARTIKEL: LIZETTE DA SILVA, GEORGE HERALD-JOERNALIS
'Ons bring jou die nuutste George, Tuinroete nuus'
