GEORGE NUUS - 'n Man (51) bekend as die 'begraafplaasverkragter', is vroeër die week vir meer as 40 jaar tronk toe gestuur.
Errol Borcherds van Conville is Maandag in die Thembalethu-streekhof tot altesaam 48 jaar gevangenisstraf gevonnis. Hy is op 'n aanklag van ontvoering tot vier jaar en op twee aanklagte van verkragting tot 22 jaar gevangenisstraf elk gevonnis wat hy samelopend gaan uitdien.
Borcherds het op 28 April 2013 'n skoolmeisie (toe 14 jaar oud) in Pacaltsdorp ontvoer en haar na die begraafplaas in Yorkstraat geneem waar hy haar twee keer verkrag het.
Volgens die jong slagoffer wat daardie betrokke dag tussen 16:15 en 18:00 na hul huis in Rosedale onderweg was, het Borcherds met 'n wit Toyota Corolla in Josephstraat by haar gestop en haar in die motor met 'n mes geforseer.
Die slagoffer het die registrasienommer van die verdagte se voertuig na die tyd op haar selfoon gestoor waarna sy die voertuig kort na die verkragting weer in Rosedale opgemerk het en kon die registrasie-nommer aan die polisie gee.
Borcherds is sowat twee maande na die voorval in hegtenis geneem.
Landdros Eugenia Jacobs, het tydens vonnisverrigtinge gesê dat kinders juis deur volwas-senes beskerm moet word omdat hulle so kwesbaar is en nie misbruik moet word nie. Jacobs het ook gesê, dat Borcherds die jong lewe van die slagoffer verewig geskend het en daar emosionele letsels gelaat is.
Die slagoffer se ouma, wat die vonnisverrig-tinge bygewoon het, het aan die George Herald gesê dat hulle nie met die vonnis tevrede is nie, en dat hy lewenslank moes kry omdat hul kind se lewe verwoes is en sy met lewenslange letsels moet sit.
Klik hier vir vorige artikels:
- 48 jaar vir begraafplaasverkragter
- Man skuldig aan ontvoering en verkragting
- Opvolg begraafplaasverkragting: Man skuldig
- Begraafplaasverkragting: Verdagte in hof
- Verdagte steek homself in nek
ARTIKEL: HENRICA VELDMAN, GEORGE HERALD JOERNALIS.
'Ons bring jou die nuutste George, Tuinroete nuus'
