GEORGE NEWS - Yorkstraat was in rep en roer tydens die jaarlikse Liggiesfees verlede Saterdag, wat die gemeenskap elke jaar vir een aand saamsnoer by Eenheidspark.
Besoekers kon aan tuisgemaakte lekkernye smul en Kersinkopies doen terwyl die kinders by die Kids Zone, 'n speelpark vir kinders naby die George-toerismekantoor, deur hansworse vermaak is.
George-burgemeester, Charles Standers, het 'n kort toespraak gelewer voordat hy die liggies onder 'n groot gejuig om 20:00 aangeskakel het. Standers het elke geestelike leier gevra om te bid vir die stad se sukses. "Soos ons die feesseisoen binnegaan, laat ons die gees van Christus uitstraal en uitreik na ander," het hy gesê.
"Dit was 'n multi-kulturele geleentheid wat deur etlike duisende mense bygewoon is," het sy gesê.
Plaaslike kunstenaars het deurentyd op die verhoog by Eenheidspark opgetree. Onder hulle was ou bekendes soos Gregory Noble, Michael Lindt en Voldi George. George het saam met die tienjarige John Marshall opgetree. Die sussies Anneke (15) en Marelise Coetzee (10) het saam die verhoog gedeel, en Zintle Mkhendane (12) het die lied All of Me deur John Legend gesing, begelei deur Alet Koch-Lochner van die George-musiekskool.
Van die plaaslike musiekgroepe wat op die verhoog was, sluit in die gospelgroep Triumphal Sound, Prerogative, No Doubt en No Regret, en die rapgroep Hakkiesdraad en Staff Members Productions. Die rieldansgroep Die Ystervarkies van Pacaltsdorp het ook 'n beurt gekry.
Klik hier vir fotogalery.
Stalletjiebesoekers het 'n verskeidenheid ware gehad om van te kies.
ARTIKEL: MICHELLE PIENAAR, GEORGE HERALD-JOERNALIS
'Ons bring jou die nuutste George, Tuinroete nuus'
