Sakkrappers krap aan sakelui

GEORGE NUUS - Haweloses en kinders wat op die straat bly verwyder deesdae vullis by woonstelle in die middedorp, deursoek dit by besigheidspersele en los 'n groot gemors wanneer hulle klaar is.

Hierdie klagte van die besigheidseienaar Sandra van Rensburg, verlede week op die George Herald se Facebook-blad, laat vrae ontstaan oor die prosedures wat gevolg moet word wanneer jy so iets aanskou, en of die owerhede enigsins beheer hieroor kan toepas?

Van Rensburg se onderneming, Tiger Wheel & Tyre, is op die hoek van Fichat- en Yorkstraat geleë. Volgens haar is daar definitief 'n toename in die gemors wat op die perseel gelos word.

"Ek het my eie ondersoek gedoen en die mense steel vullis by woonstelblokke naby ons perseel, kom deursoek dan die vullis en los dit wat hul nie wil hê nie, net so. Ons moet amper elke oggend hul gemors op ons grasperk en agter ons gebou skoonmaak," het sy gesê. Shawn Tsai, die eienaar van Q-mi kids, 'n kinderklerewinkel langs Van Rensburg se onderneming, moet ook die gemors in die tuin voor sy winkel skoonmaak.

Volgens Van Rensburg is die situasie besig om te vererger. "Soms word dames se sanitêredoekies net so op ons gras gegooi. Dit blyk die straatmense bad in ons erf en het geen skaamte nie. Menslike afval word ook gereeld enige plek gelaat. Ai dis sleg!"

Van Rensburg versoek die publiek om betrokke te raak en die polisie in kennis te stel wanneer hulle mense sien wat vullis vervoer of deursoek.

George-munisipaliteit versoek die publiek om sulke gevalle by die munisipale direktoraat wetstoepassing aan te meld, wat 'n boete sal uitreik.

Kontak hulle by 044 801 6350. Vullis wat in 'n oop gebied lê kan aangemeld word by die departement van omgewingsake by 044 802 2900 vir die skoonmaak daarvan, het Chantel Edwards-Klose, mediaskakelbeampte van George-munisipaliteit gesê.

Klik hier vir relevante artikels:

ARTIKEL: MICHELLE PIENAAR, GEORGE HERALD-JOERNALIS

'Ons bring jou die nuutste George, Tuinroete nuus'