GEORGE NUUS - Die munisipale belastingbetaler dok jaarliks R8.2 op miljoen om te sorg dat mense wat argeloos en onwettig vullis stort se gemors agter hulle opgeruim word.

Sestien spanne wat deur private kontrakteurs bestuur word, sorg dat ons strate skoon gehou word van vullis wat morsjorse agterlaat. Bykomend hiertoe het die munisipaliteit noodgedwonge 'n permanente span wat met 'n laaigraaf en vragmotor deur die dorp beweeg om onwettige vullishope op oop stukke grond op te ruim.

Hierdie maatreëls, sê Hyron Motha, orrelis van die Simon van Sirene-kerk in Rosemoor, is egter nie voldoende nie. Hy het by die George Herald gekla oor storting van huishoudelike en tuinvullis in 'n oop gebied reg langs hulle kerk se draadheining, in volle aansig van die kerkterrein. "Ons moet Sondae van seweuur af al begin skoonmaak. Dit gaan al seker drie jaar so aan. Die munisipaliteit kom ruim op, maar die volgende dag is daar nuwe vullis."

Motha, wat verantwoordelik is vir die netheid van die kerkterrein, beskuldig die munisipaliteit daarvan dat hulle nie na voorstelle vir 'n behoorlike oplossing wil luister nie. "Ek het al vir die munisipaliteit voorgestel dat houers in al die woonbuurte gebou word waar huishoudelike en tuinvullis gestort kan word. Die houers kan steenmure hê om te keer dat vullis rondwaai en die munisipaliteit kan dit dan op hierdie spesifieke plekke kom oplaai," sê Motha.

"Soos wat dit nou aangaan, het hulle geen beheer nie."

Hy sê die probleem word vererger deurdat kinders dikwels die swart sakke wat die munisipaliteit aflewer, steel om te verkoop.

Volgens André Smith, direkteur van omgewingsake, kan die munisipaliteit nie voorbly om vullis wat onwettig in woongebiede gestort word op te laai nie.

"Ons werk volgens 'n program en daar is 'n spesiale span wat net onwettige stortings opruim. Ongelukkig kan ons nie elke dag oral waar gestort word, optel nie en ondervind dat binne ure nadat 'n plek skoongemaak is, daar weer gestort word, dit ten spyte van bewusmakingsveldtogte wat deurlopend aan die gang is. Daar word ook nou tydens die GOP Roadshow pamflette in hierdie verband uitgedeel waarin mense gevra word om te help om die probleem aan te spreek.

"Die miljoene wat op die probleem spandeer word, kan elders aangewend word om infrastruktuur en lewensomstandighede te verbeter. Onwettige storting lei ook tot onhigiëniese toestande wat plaagdiere en rondloperhonde en -katte lok en so siektes versprei."

Smith sê die bou van vullishouers in woongebiede sal 'n "bitter groot" kapitale uitgawe vereis. 'n Omgewingsimpakstudie sal nodig wees omdat sulke vullissones 'n impak om omliggende inwoners sal hê. "Buitendien wil ons die dienste standaardiseer - ons wil dit nie in een stel woongebiede hê en in ander nie."

Omgewingsake het dit al oorweeg om staalgrootmaathouers in te bring, maar daarvoor is spesiaal ingerigte trokke nodig. "Die koste hiervan is astronomies en ons het besluit om eerder geld op voorligting te spandeer."

Smith het 'n beroep op inwoners gedoen om afval in swart sakke te plaas, tuinafval ingesluit. Sewe swart sakke word per huishouding toegelaat en word weekliks verwyder. "Bouafval moet na die tuin- en bourommelstortingsterrein geneem word. Dit geld ook vir oormatige tuinafval.

Om die probleem aan te spreek het ons die gemeenskap se samewerking nodig om die oortreders aan te keer. Ons smeek die gemeenskap om ons by te staan om dit te beveg," het Smith gesê.

Die publiek kan onwettige stortings by die Wetstoepassingsafdeling aanmeld by 044 801 6350.

ARTIKEL EN FOTO: ALIDA DE BEER, GEORGE HERALD-JOERNALIS

Read more about: Onwettige storting kos miljoene