Die stopteken by hierdie voetoorgang, sowel as 'n stopteken net 'n entjie verder aan die teenoorgestelde kant van die pad, is vroeër vanjaar deur George-munisipaliteit vervang met toegeetekens.
Hierdie kwelpunt is verlede Donderdag deur inwoners van Golden Valley aangeroer tydens ‘n Geïntegreerde Ontwikkelingsplan Vergadering (IDP) wat deur George-munisipaliteit aangebied is.
Die munisipaliteit is genader vir kommentaar oor die rede waarom die stoptekens verwyder is.
George munisipale bestuurder, Trevor Botha, het by navraag gesê dat hierdie kruising geoogmerk is vir 'n opgradering, en dat verkeersligte mettertyd aangebring sal word.
Jaagduiwels in Georgeweg
Volgens Dora Scriven, 'n besorgde inwoner en diensverskaffer aan Fancourt, is dit 'n kwessie van tyd voordat 'n kind of bejaarde raakgery word. "Waar motoriste vroeër stadiger gery het toe daar 'n stopteken was, jaag hulle nou bloot aan," het sy gesê.
" Wanneer 'n mens Millies gedurende spitstye besoek is dit oo amper onmoontlik om weer by die verkeer aan te sluit." Scriven het 'n petisie saamgestel wat teen Woensdag sowat 71 inwoners van Golden Valley onderteken is.
Kristy Kolberg, 'n ander inwoner, het beaam dat motoriste soggens die padoorgang baie vinnig nader. "Die mense kyk nie regtig of daar kinders of ander voetgangers staan en wag nie," het sy gesê. "Jy moet sien hoe gaan dit hier in die oggend."
In lyn met regulasies
Volgens die munisipale bestuurder, Trevor Botha, is die verandering in die padtekens by Millies in lyn met die voorgeskrewe regulasies.
"Georgeweg is 'n hoofweg en die primêre funksie is mobiliteit. Met die nuwe GO GEORGE-busdiens in gedagte is dit nou meer belangrik as ooit," het hy gesê.
Die handleiding vir die Suid-Afrikaanse Padverkeerstekens (SARTSM) dui duidelik aan dat waar spoed in belang is en waar 'n kruispunt op 'n publieke vervoerroete voorkom, stoptekens nie vir die doel aangewend mag word nie."
"Die stopteken het ook die meeste motoriste aangemoedig om verkeersreëls te verontagsaam deur nie heeltemal te stop nie, en 'n gewoonte te vorm om dit nie te doen nie. In ieder geval was die kruising by Fortuin-, Fabriekstraat en Georgeweg se diensvlak baie laag, en is dus geïdentifiseer om verbeter te word met die installering van verkeerstligte."
ARTIKEL: MICHELLE PIENAAR, GEORGE HERALD JOERNALIS.
'Ons bring jou die nuutste George, Tuinroete nuus'
