Jones het 'wind in sy seile'

GEORGE NUUS - "Daar's nog wind in my seile. Dit gaan die hardste verkiesing van my hele loopbaan wees."

Só het die voormalige DA-raadslid, Henry Jones Maandagmiddag tydens 'n onderhoud gesê. Jones is 'n onafhanklike kandidaat in die komende plaaslike regeringsverkiesing op 3 Augustus vir New Dawnpark en Andersonville (wyk 16).

Hy ding mee teen 12 kandidate in hierdie wyk. Jones is onlangs uit die DA geskors nadat hy deur die party skuldig bevind is aan diefstal en korrupsie met betrekking tot die onwettige verkoop van HOP-huise. Jones was tot onlangs die portfeuljeraadslid vir behuising vir George-munisipaliteit.

'n Hofsaak waarin Jones teregstaan op 12 aanklagte, oor dieselfde kwessie, hang tans soos 'n swaard oor sy kop. Jones moet op 28 Julie weer in die George-landdroshof verskyn. Hy laat hom egter nie afskrik nie en is vol moed dat dié sake nie water dra nie.

"Ons voel baie seker die sake gaan uitgegooi word, want daar is nie genoegsame bewyse nie," het Jones gesê.

Hy is tans kliphard besig om steun te probeer werf in wyk 16 en is van mening dat sy ondersteuners hulle nie deur die hofsaak laat afskrik nie. Jones het verduidelik dat hy spesiaal 'n prokureur van Mosselbaai, Kerneels Meyer, aangestel het om sy saak te behartig.

"Ons ken mekaar al 20 jaar. Al die prokureurs op George werk vir die munisipaliteit, ek gaan nie 'n billike verhoor kry nie," het hy gesê. "Dit is duidelik dat die party (DA) van my wou ontslae raak. Die saak kom nou al twee jaar aan."

* The former DA Portfolio Councillor for Housing, Henry Jones is standing as an independent candidate in Ward 16 in the local government election on 3 August. He said during a brief interview on Monday that it will be the hardest election yet in his political career. Jones was recently kicked out of the DA after he was found guilty by his party of corruption and theft regarding the illegal selling of RDP houses in Rosedale. Jones is currently standing trial on 12 charges relating to the same issues. His next court appearance is on 28 July in the George Magistrate's Court.

Klik hier vir verwante artikels:

ARTIKEL: MICHELLE PIENAAR, GEORGE HERALD-JOERNALIS

'Ons bring jou die nuutste George, Tuinroete nuus'