Die Humans se twee goedversorgde honde, Jessica (Staffordshire bull terrier) en Tiekie (Yorkshire terrier), was vir minstens vier dae in die moordhuis saam met Eurika se liggaam toegesluit.
Forensiese deskundiges en Groot-Brakrivier-polisie het Saterdagaand, 18 Junie, 'n deur van die slagoffers se huis in Sandhoogtepad oopgebreek, nadat bure en 'n vriendin van die Humans onraad vermoed het.
Binne die huis het 'n skokkende moordtoneel en twee getraumatiseerde honde op polisielede en omstanders gewag.
Volgens polisiewoordvoerder, sers Chantel Marais, is Tewie in die motorhuis met 'n voorwerp teen sy kop geslaan, terwyl Eurika met verskeie steekwonde aan haar nek in haar bed gevind is. 'n Nadoodse ondersoek is intussen gedoen waarna die presiese tyd van dood bevestig sal word.
'n Voorlopige ondersoek dui daarop dat Tewie gesterf het weens frakture aan sy skedel. Hy het dit waarskynlik opgedoen tydens die aanval. Eurika het vier steekwonde naby haar nek en bors gehad. Polisie vermoed die egpaar is waarskynlik op Dinsdag, 14 Junie, vermoor.
Polisiewoordvoerder, sers Chantel Marais speel met die Human egpaar se honde, Tiekie en Jessica. Foto: Louise Karsten
'Ons bring jou die nuutste Groot-Brakrivier, Tuinroete nuus'
