GEORGE NUUS - Die bekende Georgiet en formidabele tannie Greta Gericke het op 12 Oktober met 'n gesellige byeenkoms haar 98ste verjaarsdag op die plaas, Die Bof, gevier.
Sy het dit beklemtoon dat sy innig dankbaar is dat die geleentheid kon plaasvind in haar woning wat wonderbaarlik ongeskonde gebly het nadat 'n onlangse wegholveldbrand verwoesting op die plaas gesaai het.
Tannie Greta sprankel nog steeds met lewenslus ... 'n matriarg van 6 kinders, 27 kleinkinders, 28 agterkleinkinders en een agter-agterkleinkind. Sy hou nog steeds tred met almal se verjaarsdae en is sommer nog op en wakker. "Ek is baie dankbaar dat ek nog kan loop en baie dinge kan doen," beduie sy tydens ons kuiertjie.
Tannie Greta, wat ook bekend staan as die "malva-tannie" weens die verfraaiingsprojek wat sy etlike jare gelede aangepak het om George se middedorp op te kikker, het baie in haar lewe beleef.
Sy is in 1942 as jong bruid, tydens die swaarkry-oorlogsjare, deur haar oorlede man, Burger, vanaf die gekultiveerde Kaapstad na die George-distrik gebring. Sy kan terugkyk na die dae wat hulle met 'n perdekar as rytuig nagmaal bygewoon het by die NG Moederkerk, waar die plaasmense dan ook dikwels vir die naweek uitgekamp het.
"In die oorlogsjare was die grootste afleiding vir die Afrikaner om deel te neem aan volkspele." Sy en Burger was groot volkspele-geeste, nie net in George en die Suid-Kaap nie, maar hulle het ook die beweging landwyd gedien. Uit erkenning vir haar bydrae is sy tot vandag toe 'n erelid van die Eendrag-volkspelelaer in George.
Tannie Greta het na matriek in Engeland gestudeer en met haar terugkeer na Suid-Afrika 'n B.Sc.-graad in liggaamsopvoeding aan die universiteit Stellenbosch verwerf. Later jare het sy ook die graad B.Th. deur Unisa studeer en op 80-jarige ouderdom haar M.A-graad (cum laude) op Stellenbosch verwerf. Sy het in haar hoedanigheid as onderwyser by die meeste skole in George onderwys gegee.
Sy is dankbaar en trots dat sy onlangs weer die geleentheid gekry het om haar intellektuele vermoëns te toets en daarmee saam sommer 'n paar rand te kan verdien. Sy sien op die oomblik vertalings na (op 98!).
"Dit is handleidings wat vanuit Engels na Afrikaans vertaal is, en ek moet seker maak dat die kursus taalkundig korrek is.
"Ek kan nie net sit en niks doen nie," verduidelik sy. Haar taalvaardigheid kom hoofsaaklik van haar blootstelling as kind aan beide Afrikaans en Engels - haar moeder ('n nooi McKenzie) was Engelssprekend en haar vader, die bekende dr. Karl Bremer, na wie die hospitaal in Tygerberg vernoem is, Duits en Afrikaanssprekend.
Een ding wat haar altyd sal bybly is die grafskrif op haar vader se grafsteen: "Hy het sy naaste liefgehad." Hy was vir haar altyd 'n wonderlike voorbeeld om na te strewe.
Aan empatie en medemenslikheid ontbreek dit tannie Greta gewis nie. Sy sal op haar beurt onthou word vir haar byna agt dekades lange betrokkenheid by die gemeenskap van George, haar liefde vir haar familie en vriende en vir die natuur, haar geloof en haar immer-inspirerende boodskap van blymoedigheid en dankbaarheid. En as jy haar sou vra "vanwaar dit alles?" is haar antwoord: "Alles is net genade."
ARTIKEL EN FOTO: PAULINE LOURENS, GEORGE HERALD-JOERNALIS
'Ons bring jou die nuutste George, Tuinroete nuus'
