GEORGE NUUS - Nog 'n persoon het die afgelope naweek op die grondpad na Hansmoeskraal verongeluk. Dit is die derde ongeluk met lewensverlies sedert die begin van die jaar.
Die oorledene, Raffeti Manewil (47) van Rosedale, wat 'n passasier in die voertuig was, en nog twee ander mans, Johnathan Alaart en Sonny Plaatjies was Saterdag 25 Maart omstreeks 07:00 onderweg in die rigting na Pacaltsdorp toe die bestuurder beheer oor die bakkie verloor het. Die voertuig het verskeie kere tot naby die ingang van Die Bof gerol. Al drie die mans is uit die voertuig geslinger.
Beide Alaart en Plaatjies is deur ER24 en Metro-nooddienste na die George-hospitaal geneem. Navrae aan die hospitaal oor hul toestand is teen druktyd nie beantwoord nie.
Die polisie het vandeesweek bevestig dat bloedmonsters vir alkohol geneem is en dat hulle benewens die saak van strafbare manslag ook 'n klag van dronkbestuur teen die bestuurder ondersoek. Hulle wou egter nie die naam van die bestuurder bekend maak nie, omdat al drie mans uit die voertuig geslinger is en dit deel vorm van hul ondersoek.
Intussen het versoeke van die publiek ingestroom waarin hulle by die owerhede pleit om 'iets omtrent die grondpad te doen'. Een van die inwoners, wat langs die pad woon, sê hulle is baie bekommerd oor die aantal ongelukke en jammer oor die sterftes.
"Ons wat elke dag die pad ry, ken die kinkels in die pad. Dit is besoekers van elders of inwoners wat nie aan die pad gewoond is nie, wat in die moeilikheid beland. Hier is minstens een keer elke twee weke 'n ongeluk waar motors die pad verlaat. Die situasie is veel erger as wat die owerhede dink, die pad is gevaarlik. Die pad is verlede week geskraap en boonop het dit nog gereën ook - dis dan wanneer jou voertuig so maklik gly," sê die inwoner.
Die George-munisipaliteit, onder wie die pad val, het by navraag gesê 'n padteken sal by die laaste 3-rigtingstop aangebring word om die spoed te verminder aan die begin van die grondgedeelte. Ander waarskuwingsborde sal ook aangebring word.
Die munisipaliteit het vroeër gesê dat die opgradering van die pad afhanklik is van die beskikbaarheid van finansiering.
- In nog 'n noodlottige ongeluk die naweek het Leon Coetzee (53), 'n eiendomskonsultant van Hartenbos, Sondagmiddag, 26 Maart, gesterf toe sy motorfiets teen 'n reling langs die R102 buite Groot-Brakrivier gebots het. 'n Lykskouing toon Coetzee het 'n beroerte gehad. Klik hier om meer te lees.
Danté Kraus: "Waar is Hansmoeskraal, die plek is drm baie in di nuus met sulke gevalle."
Robin Dixon: "Wragtig man. hoeveel d#nerse families mt nog langsaan oop grafte staan a.g.v. Swak infrastriktuur gehalte."
Roberta Botha: "Die inwoners vra al baie jare dat die pad moet geteer word, maar hulle se net daar is nie geld nie. Die pad is 'n daaglikse gevaar hy word geskraap maar dit word nie reg gedoen nie, hy word al kleiner geskraap ook. Dalk is dit tyd dat die munisipaliteit gedagvaar word vir die sterftes, dan sal hulle dalk hoor."
Ampie de Beer: "Hoe kan dit nou munisipaliteit se skuld wees??? As jy ordentlik ry op n grondpad sal jou kar nie gly nie PUNT."
'n Eiendomskonsultant van Hartenbos, Leon Coetzee (53), het Sondagmiddag (26 Maart) gesterf toe sy motorfiets teen 'n reling langs die R102 buite Groot-Brakrivier gebots het.
ARTIKEL: LIZETTE DA SILVA, GEORGE HERALD-NUUSREDAKTEUR
'Ons bring jou die nuutste George, Tuinroete nuus'
