GEORGE NUUS - In reaksie op verlede week se artikel in die George Herald "Not Racism, but bullying is just as bad" het Meranda van Niekerk, 'n maatskaplike werker by Famsa, 'n bietjie meer inligiting oor afknouery verskaf.
Boeliegedrag is 'n algemene verskynsel onder kinders en onderskei nie tussen ouderdom, geslag, ras, en of sosio-ekonomiese klas nie.
Die literatuur beskryf verskeie teorieë om boeliegedrag te verduidelik, en sluit die volgende moontlike redes vir die ontwikkeling van boeliegedrag in:
- Strewe om andere se meerdere te wees as gevolg van 'n dieper gewortelde gevoel van minderwaardigheid;
- Moontlike versteurings in die ontwikkeling van empatie teenoor ander; 'n proses wat deel uitmaak van die ontwikkelingsjare; of
- 'n Wanbalans in die koestering en verwenning van die kind, deur sy/haar ouers, wat kan lei tot kinders wat optree asof die wêreld, hul behoeftes ten alle tye moet bevredig.
Famsa werk individueel met slagoffers van boeliegedrag in die vorm van spelterapie. Hier-die kinders is gewoonlik kwesbaar (vir welke rede ook al), en ervaar dus 'n neiging om geboelie te word, waarna hul gewoonlik die teiken van boelies word.
Aan die ander kant wil dit voorkom asof boelies min of geen vrese of emosies wys, en dat die ontwikkeling van empatie, of vlakke van empatie ontbreek. Die ontwikkeling van empatie is belangrik omdat hierdie proses kinders help om ander se pyn te ervaar sodat hulle kan leer hoe om versorgend teenoor hul portuurgroep op te tree.
Spelterapeute sal vir hierdie rede dus fokus om kinders wat boelie te leer om meer sensitief teenoor ander op te tree tesame met ouerleiding sodat empatiese gedrag by die ouerhuis voortgesit kan word.
Dit is belangrik om te verstaan dat die evaluasie van 'n kind deur sy of haar portuurgroep 'n kritieke rol speel in die uiteindelike selfwaarde van so 'n kind. Juis hieroor is dit dan belangrik dat gedrag optimaal verbeter word sodat die vlak van selfwaarde by kinders met probleem-gedrag verbeter, wat uiteindelik behoort te lei tot 'n meer gebalanseerde samelewing.
Deur spelterapie leer boelies en hul slagoffers wat die uiteindelike gevolge is van hul gedrag, en dat hulle die keuse kan maak om deel te neem aan sulke gedrag of nie. Die kwaliteit van verhoudings binne die portuurgroep gedurende die laerskoolfase dien as fondament vir die kind se toekomstige verhoudings tesame met positiewe of negatiewe verwagtinge van verhoudings met ander in die toekoms. Dit is dus baie belangrik dat kinders van vroeg af ervaar dat hul gemaklik kan funksioneer en omgaan met ander binne hul portuurgroep.
Vir meer inligting kontak vir Famsa 044 874 5811.
'Ons bring jou die nuutste George, Tuinroete nuus'
