GEORGE NUUS - Net ongeveer twee kinders word elke jaar by hulle biologiese ouers teruggeplaas sê
Janita Vorster, maatskaplike werker van Badisa, George.
"Die grootste rede vir die min terugplasings is dat die maatskaplike omstandighede van die biologiese ouers nie verbeter het nie."
Vorster verduidelik: "Wanneer kinders verwyder word, word hulle aanvanklik vir 'n tydperk van 90 dae in tydelike veiligheid geplaas. Gedurende hierdie tydperk moet die betrokke maatskaplike werker die saak ondersoek en indien die biologiese ouers se omstandighede steeds nie in die kind se beste belang is nie, word die kind in pleegsorg ge-plaas, vir 'n tydperk van twee jaar."
Die doel van pleegsorg is om tydelike versorging aan kinders te bied, terwyl hulle bio-logiese ouers die geleentheid kry om hulle maatskaplike omstandighede te verbeter.
"As gevolg van die biologiese ouers se swak samewerking of onbetrokkenheid en onveranderde maatskaplike omstandighede, word pleegsorgplasings dikwels na die twee jaar weer verleng," sê Vorster.
Statistiek toon dat gemiddeld 17,7% van biologiese ouers, aan wie gesinsherenigingsdienste gelewer word, aktief betrokke is by hierdie dienslewering. Maatskaplike werkers is van mening dat die statistiek toegeskryf kan word aan verskeie redes soos die negatiewe houding van biologiese ouers teenoor maatskaplike werkers veral as dit dieselfde maatskaplike werker is wat die kind verwyder het.
Tweedens voel die biologiese ouers dat hulle nie langer 'n verantwoordelikheid het teenoor die verwyderde kind nie en gaan dan voort met hulle negatiewe leefstyl. Die grootste bekommernis is dat die biologiese moeder dikwels weer swanger raak en dit blyk asof hulle belang verloor by die kind wat reeds verwyder is.
Met positiewe samewerking vanaf biologiese ouers met die betrokke maatskaplike werkers kan die maatskaplike omstandighede in so 'n mate verbeter dat die kind herenig kan word met die gesin.
"Dit is ons uiteindelike doelwit," sê Vorster.
Die Badisa-span van links: Louwdene Figeland (gemeenskapsontwikkelingswerker), Amonette Prinsloo en Janita Vorster (maatskaplike werkers), Maria Matolla (kantoorhulp), Carlisle William (maatskaplike hulpwerker) en Fanie Jordaan (administratiewe hoof). Foto: Myron Rabinowitz
Kollig op Badisa
Badisa is 'n gesamentlike bedieningsaksie van die NG Kerk (Wes- en Suid-Kaap) en die VGK (Kaapland), wat tot stand gekom het in 2003.
Die barmhartigheidsbediening van die NG Kerk was bekend as CMR (Christelike Maatskaplike Raad). Op 28 Januarie 2003 het die twee kerke ooreengekom om 'n gesamentlike bediening te begin onder die naam Badisa. Die naam was "sommer net" 'n samevoeging van woorde - Barmhartigheid, Dienste/Diakonaat en Saam. Eers nadat Badisa as amptelike naam bedink is, is ontdek dat daar werklik 'n woord soos 'Badisa' bestaan. In Tswana beteken dit 'Herder' en 'Versorger".
Badisa George is 'n geregistreerde nie-regeringsorganisasie wie se dienste fokus op kinderbeskerming, voorkoming, vroeë intervensie, statutêre dienste, gesinshereniging en versterking van gesonde gesinsfunksionering.
Laasgenoemde dienste word gelewer deur twee maatskaplike werkers en een maatskaplike hulpwerker wie se dienslewering fokus op pleegsorg en gesinsherenigingsdienste.
Badisa het 'n gemeenskapsontwikkelings-werker wat projekte hanteer soos: bewusmaking, kinderbeskerming, vakansieprogramme, ouerleiding, veiligheidsouer- en vrywilligersopleiding, vroeë kinderontwikkeling en nasorg.
Badisa lewer tans dienste in die volgende areas:
George-sentraal, George-Suid, Denneoord, Bergsig, Lavalia, Proteapark, Blanco, Witfontein (natuurbewaring) en die landelike gebied van George.
Badisa is hoofsaaklik afhanklik van donasies van donateurs, kerke en besighede. U word dus genooi om deel te word van Vriende van Badisa deur middel van inskakeling by projekte, finansiële bystand, skenkings in die vorm van kruideniersware en klere vir kinders. Kontak Badisa George by 044 874 5013.
ARTIKEL EN FOTO: MYRON RABINOWITZ, GEORGE HERALD - JOERNALIS
'Ons bring jou die nuutste George, Tuinroete nuus'
