GEORGE SAKE NUUS - George-sakeondernemings kan aansoek doen vir werksessies om hulle entrepreneursvaardighede vroeg in volgende jaar op te skerp.
Die werksessies vir kleinsakeontwikkeling vorm deel van 'n inisiatief van die Wes-Kaapse departement van ekonomiese ontwikkeling en toerisme en die Sentrum vir Toegepaste Entrepreneurskap by USB Bestuursontwikkeling (USB-BO), die publieke maatskappy van die Universiteit van Stellenbosch.
Die tweedag-werksessies sal op ses dorpe in die provinsie aangebied word. Dit is daarop gerig om werkskepping vir ekonomiese groei in die Wes-Kaap te bevorder.
Die eerste een word van 30 November tot 1 Desember op Moorreesburg gehou, gevolg deur Caledon van 2 tot 3 Desember en Worcester van 8 tot 9 Desember. Daarna volg Beaufort-Wes, George en Bellville, wie se datums nog aangekondig sal word.
"Dit gebeur dikwels dat bestuurders in so 'n mate by die dag-tot-dag uitdagings van hul onderneming betrokke raak dat hulle hul toekomsbeplanning ten opsigte van hul kliënte se behoeftes afskeep. Die werksessies wil entrepreneurs help om vir die volgende siklus van hul onderneming te beplan om só hul kwesbaarheid te verminder," sê De Wet Schoeman, direkteur van die USB-BO.
Deelnemers sal aan hulpmiddels en metodes bekend gestel word wat verandering kan identifiseer sodat hulle die impak van verandering kan beoordeel en die geleenthede wat hieruit voortspruit kan benut. Riglyne word ook verskaf om sakemodelle vir waardeskeppende strategieë te ontwerp.
Verdere opleiding en ondersteuning
Altesame 150 deelnemers word vir die ses werksessies aanvaar. Twintig deelnemers sal teen Maart 2016 uit die aanvanklike groep gekies word vir verdere opleiding en ondersteuning.
Die vereistes vir die bywoon van die werksessies is die volgende:
- Ten minste twee jaar se ondervinding in die bedryf van 'n onderneming
- Die bedryf van 'n onderneming wat in die Wes-Kaap geleë is
- 'n Geldige belastingsertifikaat
Alan Winde, provinsiale minister van ekonomiese geleenthede, sê hulle belangrikste doelwit in die provinsie is om geleenthede vir ekonomiese groei en werk te skep. Kleiner ondernemings is belangrike werkskeppers en voorsien tans sowat 500 000 mense in die Wes-Kaap van werk.
"Ons het die afgelope vyf jaar aan meer as 20 000 entrepreneurs hulp verleen om te groei. Ons rol is om die regte omgewing te skep vir kleiner ondernemings om te floreer. Om dit te doen, werk ons hard daaraan om administratiewe rompslomp te verminder en toegang tot fondse te fasiliteer.
"Ons gee ook voorkeur aan die uitrol van 'n ekonomiese infrastruktuur, wat toegang tot breëband-internet insluit," sê Winde.
Vir meer inligting en om aansoek te doen, kontak Doris Viljoen by doris.viljoen@usb-ed.com of 082 965 7007.
'Ons bring jou die nuutste George, Tuinroete nuus'
