GEORGE NUUS - Riana Scheepers vind die lewe in Wilderness rustig en verkwikkend vir haar kreatiewe siel. En dis hier in die alombekende skrywer se unieke kasteelhuisie waar sy aan die idee gekom het om 'n kompetisie te reël waaraan alle mense van die reënboognasie kan deelneem.
Sy is nog besig om die finale besonderhede uit te stryk, maar dit sal daarop neerkom dat mense hul kreatiewe denke inspan om 'n vuurhoutjiedosie te versier en 'n miniatuur-kunswerk te skep.
Dit kan 'n gedig wees wat in die dosie pas, of 'n skitterende juweelbeplakte dosie. Die moontlikhede is onbeperk, vertel Riana opgewonde.
"Dis 'n hele gedoente," vertel sy. "Ek noem ons nuwe tuiste sommer 'n malhuis!"
Die verhaal oor hoe sy en haar man, Johann, in Wilderness beland het is heel interessant.
'"n Vriendin het 'n biblioteek in Karatara begin, en ek het besluit ek sou dit graag wou sien. Op pad terug (via Hoekwil) het ons deur Wilderness gery en besef watter wonderlike dorpie dit is. Ons het 'n stukkie grond gekoop met die idee om eendag hier te kom aftree. Maar toe ons skielik 'n goeie aanbod vir ons wynplaas in Wellington kry, het Johann en ek onmiddellik besluit om dit te aanvaar.
Intussen moes ons dadelik 'n ander blyplek kry, en dis toe dat ek op hierdie eienaardige huis afgekom het, amper op die oewer van die meer. Hier was nie eers 'n kombuis nie."
Riana, wat ook bekend is as 'n bobaas kok, kan haar deesdae egter uitleef in 'n klassieke kombuis met twee glaskabinette waarin haar versameling glase pryk.
Nog een van Riana se talle prestasies is 'n doktorsgraad oor die kortverhaal oeuvre van Koos Prinsloo wat sy aan die Universiteit van Kaapstad behaal het.
Sy het talle boeke vir volwassenes en kinders in druk en het al verskeie toekennings vir haar werk ontvang. Sy word gereeld genooi om in Nederland en in Frankryk op te tree en bied kreatiewe skryfkursusse aan. Riana is lief vir reis en was sopas saam met Johann in Hong Kong.
Een van die dinge wat na aan haar hart lê is die samestelling van die boek, Die melkweg het 'n ster lat val - plaasstories eg aan Suid-Afrika wat saam met Nicci Thabo saamgestel is. Dit was ter herdenking van die 300 jarige bestaan van die wynplaas De Compagnie in Wellington, waar hulle tot onlangs gewoon het. Selfs ongeletterde werkers het die kans gekry om hul verhaal te vertel.
"Ek het dit net eenvoudig aangeteken soos hulle dit vertel het en hulle was vinnig om uit te wys as dit nie heeltemal was soos hulle dit vertel het nie," vertel Riana.
Ter illustrasie van haar siening dat 'n mens hard moet werk om iets te bereik, vertel Riana dat sy uit 'n arm huishouding kom. Haar pa was 'n spoorwegwerker en die gesin was verpletter toe hy gesterf het. Sy was net ses jaar oud. Haar ma moes met vele ontberings haar gesin grootmaak en alleen die mas opkom. Riana het ooglopend haar ma se deursettingsvermoë geërf en na skool het sy gaan studeer en vir ses jaar by die Universiteit van Kaapstad asook die Universiteit van Zululand klas gegee.
Riana was die enigste Afrikaanse digter wat uitgenooi is om op 11 Julie 2002 deel te wees van die Vlaamse Parlement se 30-jarige herdenking. Hier het sy saam met ander Europese digters 'n voorlesing gedoen.
Te midde van haar kleurryke lewe geniet sy dit om in Wilderness wortel te skiet waar sy haar hond, Klara, vir lang wandelings neem en ook tyd kry om saam met haar kat, Blommetjie, heerlik klassieke musiek te luister.
Die bekroonde skrywer Riana Scheeper,s en haar man Johann, het nou 'n besonderse kleurvolle huis wat uitkyk oor die Touwrivierstrandmeer. "Ek wou graag 'n ongewone huis hê," vertel sy. Dit het heelwat inspanning geverg om dit te restoureer en leefbaar te maak. Klara geniet die stappies om die meer. Foto's: Pauline Lourens
Riana se slaapkamerbalkon kyk uit op die Touwrivierstrandmeer. Blommetjie haar pronkkat doen 'n balanseringtoertjie.
ARTIKEL EN FOTO'S: PAULINE LOURENS, GEORGE HERALD - JOERNALIS
'Ons bring jou die nuutste George, Tuinroete nuus'
