SPORT NUUS - Groot opgewondenheid heers in Waboomskraal en die Langkloof terwyl die Young Leaves-rugbyklub gereed maak vir die SWD Karoostreek-liga se groot eindstryd op Saterdag 5 September.
Young Leaves A pak Tigers A van Ladismith in die eindstryd by die Van Riebeeck-stadion in Mosselbaai.
Vir die klub en die gemeenskappe wat die span ondersteun, is dit veel meer as net nog ’n rugbywedstryd.
Die span bestaan hoofsaaklik uit spelers van die plase tussen Waboomskraal en die Langkloof, met ’n aantal spelers wat tans in George woon, maar steeds hul wortels in die plaasgemeenskappe het.
Die span se deelname aan die eindstryd dra vanjaar besondere emosionele betekenis. Young Leaves dra die wedstryd op aan hul geliefde skrumskakel, Godfrey Jacobs, wat sowat ’n maand gelede tragies in ’n motorongeluk tussen Dysselsdorp en De Rust oorlede is.
Jacobs was ’n belangrike deel van Young Leaves se sukses gedurende die seisoen en was onder sy spanmaats en ondersteuners bekend as die ‘Little Master’ agter die skrums. Sy afwesigheid word diep gevoel, maar sy spanmaats wil sy nagedagtenis op ’n besondere manier eer deur alles op die veld te gee.
Young Leaves het Anton Botha van South Hops bedank vir sy ondersteuning deur die jaar. Botha het onder meer vervoer, toilette en die rugbyveld beskikbaar gestel en het ook ’n belangrike rol gespeel met die instandhouding van die veld.
Volgens die klub het hierdie ondersteuning ’n groot verskil gemaak en die spelers in staat gestel om gedurende die seisoen aan wedstryde deel te neem, as ’n span te groei en uiteindelik hul plek in die eindstryd te verseker.
Die wedstryd in die eindstryd word opgedra aan wyle Godfrey Jacobs wat die span se geliefde skrumskakel was.
Vir die mense van Waboomskraal, die Langkloof en die omliggende plaasgemeenskappe is Young Leaves se eindstrydplek ’n bron van groot trots.
Die gemeenskap word genooi om die span te ondersteun en saam met hulle hierdie besondere hoofstuk in Young Leaves se rugbygeskiedenis te vier.
‘Ons bring jou die nuutste Tuinroete, Hessequa, Karoo nuus’
