Nadat daar die vorige nag, ook omstreeks middernag, pogings was om by die huis in Steynbergstraat, Island View, in te breek, het die huiseienaar Woensdagnag met sy pistool onder sy kopkussing gaan slaap.
Met die eerste voorval op Woensdagoggend was die inwoners nog wakker toe die geblaf van hul twee honde die poging tot inbraak by hul huis gefnuik het. Die honde word binne die huis gehou.
Donderdagoggend na middernag het die inwoners wakker geword toe drie mans deur hul pas-gebreekte groot kamervenster tot in die hoofslaapkamer gespring het. Twee van die gewapende rowers het die man in die bed getakel, terwyl die ander op sy 44-jarige vrou gefokus het. Sy vrou het uit die bed opgespring toe een rower bo-op die huiseienaar gaan sit en hom aangerand het.
