GEORGE NUUS - Dit is met groot opgewondenheid en trots dat Hibernia Primêr aangekondig het dat Haylene Muller amptelik as skoolhoof aangestel is.
Muller is reeds 11 jaar verbonde aan die skool. Sy was die afgelope vier jaar departementshoof van die grondslagfase en het vir drie van dié vier jaar as waarnemende adjunkhoof gedien. Sy volg in haar pa se voetspore, aangesien hy voorheen skoolhoof van Hibernia Primêr was.
Muller het gedeel dat haar pa verlede jaar oorlede is en dat hy haar grootste motivering was om vir die pos aansoek te doen. Sy het haar aanstelling as 'n "volsirkel-oomblik" beskryf.
Die aanstelling is 'n besondere mylpaal vir die skool, aangesien Muller die eerste vroulike skoolhoof in die geskiedenis van Hibernia Primêr is. Sy sê sy voel geëerd om dié rol te vervul.
Haar visie vir die skool sluit groei en ontwikkeling vir beide leerders en opvoeders in. "Partykeer konsentreer ons te veel op net die leerders en nie genoeg op die opvoeders nie," het sy gesê. Sy sien groot geleenthede vir die skool, veral op die gebied van kodering en robotika, asook wiskunde.
Die skool het op hul Facebook-blad geskryf: "Namens die beheerliggaam, personeel en die breër Hibernia Primêr-gemeenskap wil ons ons opregte dank en waardering uitspreek aan Muller vir haar uitsonderlike leierskap, toewyding en onwrikbare verbintenis tot ons skool.
"Ons wens haar alle voorspoed en sukses toe in haar amptelike rol as skoolhoof. Mag haar leierskap voortgaan om uitnemendheid, groei en nuwe geleenthede binne ons skoolgemeenskap te inspireer."
‘Ons bring jou die nuutste Tuinroete, Hessequa, Karoo nuus’
