GEORGE NUUS - Die blasers in die streek het vir eers hul fluitjies neergelê, en geen ligawedstryde in die SWD Top 8 Superliga-kompetisie sal die komende naweek gespeel word nie.
Dit geld ook vir die wedstryde in die Uitdaagbekerreeks en die Eerste liga-kompetisies.
Slegs die wedstryd in die Kusstreek-finaal op Saasveld en die Karoo-streek se halfeindronde op Oudtshoorn word môre, Saterdag 30 Augustus, gespeel.
Dié aksie deur die SWD-skeidsregters volg ná uitsprake in twee tugverhore waar plaaslike klubs aangekla is oor voorvalle waarin skeidsregters se veiligheid in gedrang gekom het.
In een van die voorvalle is ’n skeidsregter met ’n glas gegooi wat hom in die maag getref het, terwyl ’n ander skeidsregter ná afloop van ’n wedstryd deur toeskouers aangerand is.
“Die boetes wat Groot-Brakrivier en Bridgton hierdie week opgelê is, is belaglik,” sê ’n skeidsregter wat verkies het om anoniem te bly.
“Die unie en sy dissiplinêre komitee het nie met dié boetes ’n duidelike en ernstige boodskap aan die klubs uitgestuur nie. Daarom weier ons om te blaas. Ons is nie hier om rugby dood te maak nie. Ons wíl blaas, maar dit moet onder veilige omstandighede gebeur. Hoe regverdig jy ’n skeidsregter se veiligheid met net ’n R100 000-boete?"
George Herald het vandag na Gavin Esau, voorsitter van die SWD-skeidsregtersvereniging, vir kommentaar uitgereik, maar kon hom nie bereik nie.
Esau het vroeër hul eise, dat strenger sekuriteitsmaatreëls ingestel moet word om toegang tot die veld te beheer, en dat veilige roetes vir wedstrydbeamptes gewaarborg moet word, beklemtoon.
Hulle versoek ook dat toeskouers deur heinings van die speelveld geskei word en dat daar ’n beleid van geen verdraagsaamheid moet geld wanneer skeidsregters aangeval word.
Nog voorstelle sluit in dat die klubs verantwoordelik gehou moet word vir veilige kleedkamers, die aanwys van ’n skakelbeampte en behoorlike begeleiding van beamptes.
Glasbottels en alkohol by wedstryde moet verbied word, terwyl spelers, afrigters en ondersteuners voortdurend opgevoed en herinner moet word aan respek en die gedragskode van die sport.
Geen name van skeidsregters is aangebring op die aanstellingslys vir die naweek se wedstryde nie.
Vorige artikels:
‘Ons bring jou die nuutste Tuinroete, Hessequa, Karoo nuus’
