GEORGE NUUS - Progress het Saterdagmiddag in 'n klipharde derby vir Silver Stars op die Rosemoor-sportterrein met 17-3 geklop. Rustyd was die wenspan met 10-0 voor gewees.
Progress is na 14 wedstryde met 61 punte steeds die voorloper op die punteleer in die SWD Premierliga-kompetisie.
Die skeidsregter, Charl Jacobs van Riversdal, het net na rustyd vir Jade Roelfse (losskakel) van Progress met 'n geelkaart van die veld gestuur.
Die wenspan het net voor rustyd 'n groot terugslag gekry toe Creshwin Joseph (binnesenter) die veld moes verlaat weens 'n lies-besering. Joseph is vervang deur Werner Jacobs.
Dit was 'n wedstryd wat nie aan die verwagtinge voldoen het nie. Albei spanne het hul skuldig gemaak aan talle hanteerfoute en die spel kon nie vloei nie.
Vir Progress het hul lenige agtsteman, Solomon Manxodidi, uitstaande spel gelewer. Hy het 'n barshou gespeel in die vastelos en was ook 'n toring van krag vir sy span in die lynstane. Alvin George (loskopstut) André Bernardo (slot), Leroy Dickens (flank) Ethan Williams (buitesenter) en Clinton Wagman (regtervleuel) kan ook tevrede voel met hul spel.
Vir Silver Stars het Garth Maduna (flank), Elgin Joseph (haker) en Marshall Boesak (binnesenter) die oog gevang.
Progress se drieë is deur Manxodidi en Ashwill Nortje (skrumskakel) gedruk. Roelfse slaag met 2 doelskoppe en 'n strafdoel. Neillin Sott (heelagter) het vir Silver Stars 'n strafdoel oorgeklits.
Evergreens het 4 puik drieë gedruk in hul volpunte oorwinning van 24-20 oor Groot-Brakrivier op sy tuisveld.
Die wenspan het puik spel gelewer in die eerste helfte van die wedstryd en het voor rustyd reeds 3 pragdriëe gedruk. In die vaste fasette en met dryfmaalbewegings het hul baie druk op die tuisspan geplaas. Hul verdediging was ook rotsvas.
Voorlangs het Stanley Tshetha (slot), Anvor Prins (loskopstut) en Arden Wesso (flank) die vonk verskaf. Agterlangs was Divandre Strydom (buitesenter) en Nathan Beukman (linkervleuel) gevaarlik met die bal in die hand.
Beukman, Cheslin van Reyner (haker, 2) en Buran Parks (agtsteman en kaptein) het vir Evergreens gaan druk. Erwin Harris (losskakel) slaag met 2 doelskoppe.
Vir die tuisspan is Maselleidian Korkee (binnesenter), Ricardo van Wyk (losskakel) Rayvian Wesso (stut) oor vir drie. Henlinn Botha (heelagter) slaag met 'n doelskop en 'n strafdoel.
Barbarians het sy posisie verstewig op die punteleer met hul wegholoorwinning van 49-7 oor Maori's op die D'Almeida-sportterrein.
Elroly Havenga (binnesenter, 2), Winston Seconds (agtsteman, 2), Chester Mitchell (plaasvervanger-heelagter, 2) Curshwon Mono (linkervleuel), Hendrik Kriek (loskopstut), Lehane Kiewiet (plaasvervanger-flank) het gaan druk vir Barbarians. Ralton Ocober (losskakel) slaag met 2 doelskoppe.
Bridgton het op sy tuisveld maklik vir Blanco met 50-17 afgeransel. Lee Henry Meyer (regtervleuel), Gino van Vuuren (losskakel) Cheslin September (plaasvervanger-stut), Charlson Ewerts (plaasvervanger-vleuel), Anver Venter (buitesenter, 2), Bradwin Waniers (heelagter, 2) het vir die wenspan gaan druk. Wanies slaag ook met 'n doelskop en Van Vuuren klits 4 doelskoppe oor.
Puntemakers: tweede en derde spanne
Progress II (31): Drieë - Merlin Geswindt (binnesenter, 2) Lorenzo Williams (losskakel), Sylvester Lewies (plaasvervanger). Brisslin Blom (buitesenter) slaag met 2 doelskoppe en 'n strafdoel.
Silver Stars II (15): Drieë - Joseph James (flank, 2). Ismael Grondkoning (skrumskakel) slaag met 'n doelskop en Brian Botha (linkervleuel) klits 'n skepdoel oor.
Progress III (32): Drieë - Eugene Heneke (losskakel), Schaquille Hardnick (flank), Jason Lee (slot), Stevano Olivier (plaasvervanger). Heneke slaag ook met 3 doelskoppe en 2 strafdoele.
Silver Stars III (0).
Evergreens II (22). Drieë - Sheldon Bruinders (agtseman), Brent Scheepers (flank), Lee Roy Pojie (losskakel). Quinton Afrika (heelagter) slaag met 2 doelskoppe en C-Than Moos (plaasvervanger- senter) met 'n strafdoel.
Groot-Brakrivier II (16): Drieë - Jeromique Wesso (linkervleuel, 2), Deavon Karelse (heelagter) slaag met 2 strafdoele.
Groot-Brakrivier III (33): Drieë - Redwaan Botha (heelagter), Enslin van Heerden (buitesenter), Ashwin Meyer (binnesenter), Emile Moolman (agtsteman, 2). Reduaan Botha (heelagter) slaag met 'n doelskop en 'n strafdoel.
Evergreens III (12): Drieë - Curtley Carelse (haker), Duarte Carolus (flank). Eric Willemse (losskakel) slaag met 'n doelskop.
Barbarians II (56): Drieë - Chester Mitchell (regtervleuel), Marshall Daniels (buitesenter), Bennet Quantini (agtsteman), Gary Olckers (loskopstut) Andreu Arries (plaasvervanger-vaskopstut) Ferdi Olivier (plaasvervanger-skrumskakel), Randle Otto (linkervleuel, 2), Vivian Groenewald (vaskopstut, 2). Randle slaag met 2 doelskoppe.
Maori's II (0).
Barbarians III (55): Leolan Mondoe (heelagter, 2), Keanan Miller (regtervleuel, 2). Leeroy Muller (linkervleuel, 2), Hegan Jansen (buitesenter), Zayn Gelderbloem (binnesenter), Grainger Tesner (flank). Lohane Kiewiet (plaasvervanger-losskakel) slaag met 5 doelskoppe.
Maoris III (0).
Bridgton II (50): Drieë - Conroy Tiemie (buitesenter, 3). Kurt Rhode (regervleuel), Josef Saptou (binnesenter). Duzill Avontuur (linkervleuel), Cobus Coetzee (vaskopstut), Ernest Manuel (plaasvervanger-flank). Lavano Nathan (losskakel) slaag met 5 doelskoppe.
Blanco II (7):
Bridgton III (26): Drieë - Wilfred Ntalanganiso (flank), Alteano Matolla (haker). Roswin van Hansen (loskopstut), Jacques Julies (losskakel). Julies slaag met 3 doelskoppe.
Blanco III (3).
ARTIKEL: ANDRE STANDER
'Ons bring jou die nuutste George, Tuinroete nuus'
