SUID-KAAP NUUS - Welkom was gister, Saterdag 27 Junie, alles behalwe verwelkomend vir die Griffons.
Die Dotsure SWD Arende het die sogenaamde top-van-die-puntelys botsing in 'n eensydige vertoning omskep en met agt pragdrieë hul grootste vertoning van die seisoen gehad.
Voor die wedstryd het baie verwag dat twee onoorwonne spanne mekaar tot die einde sou toets. In plaas daarvan was dit die Arende wat van die eerste fluitjie af die tempo bepaal het en hul teenstanders met vinnige balle, sterk vaste fasette en kliniese afronding uitmekaar gespeel het.
Ulrich Stander was eenvoudig uitstaande.
Die blitsige flank het drie keer oor die doellyn gegaan en was deurgaans 'n nagmerrie vir die Griffons se verdediging. Sy driekuns was die hoogtepunt van 'n spanvertoning waarin elke speler sy rol perfek vervul het.
Sinalo Jivana, Ewan Coetzee, HD Stemmet, Kyle Cyster en Rune Lucas het die res van die Arende se drieë aangeteken en sodoende die span se aanvallende diepte beklemtoon.
Terwyl die agterlyn die applous ontvang het, moet groot krediet aan die voorspelers gegee word.
Hulle het die Griffons onder geweldige druk geplaas, oorheers by die afbreekpunte en weereens 'n stewige fondament gelê waarop die agterspelers kon bou.
Divan du Toit was feitlik foutloos met die skopskoen en het ses verdoelings by sy puntetotaal gevoeg.
Fred Zeilinga het ook twee punte bygedra.
Wat hierdie oorwinning nog meer indrukwekkend maak, is dat dit op vreemde bodem teen een van die gunstelinge vir die titel behaal is. Ná drie rondes is die Arende steeds onoorwonne en hul spel word elke week meer afgerond.
Onder Heyneke Meyer begin die span die kenmerke van kampioene toon, geduld wanneer dit nodig is, fisieke oorheersing voorlangs en die vermoë om genadeloos toe te slaan wanneer geleenthede ontstaan.
As die eerste drie rondes enigiets is om op te gaan, sal die res van die Carling Curriebeker Eerste Divisie baie hard moet werk om die Arende van George van hul vlug na die eindstryd af te bring.
Eindtelling: Arende 54 - 26 Griffons.
‘Ons bring jou die nuutste Tuinroete, Hessequa, Karoo nuus’
