Dié skietdag word gereël deur Anton Meyer vir sy suster, Anja van Niekerk, wat tans in Kaapstad intensiewe behandeling, waaronder chemoterapie, vir leukemia ondergaan.
Meyer het aan die George Herald gesê die reiskoste Kaap toe en terug vir die behandeling kos 'n aardige bedrag. En die chemo kan net in Kaapstad by die Mediclinic Constantia gedoen word. Die verblyf van die persoon wat haar soontoe neem, stoot die kostes verder op.
Hy sê sy suster kon die laaste agt maande nog glad nie werk nie en al haar siekte- en gewone verlof is boonop reeds uitgeput.
"Die klierkanker wat verlede jaar by Anja gediagnoseer is, het vererger en 'n maand gelede is beenkanker, ook 'n tipe leukemia, by haar gediagnoseer. Daarom wil ons alle skuts uitnooi om die dag ten bate van Anja by te woon."
Skuts met enige handwapens en haelgewere is welkom.
Daar is ook 'n kompetisie vir windbukse (pellet guns). Daar gaan ook 'n swartkrytgeweer-demonstrasie wees en mense sal geleentheid kry om hierdie antieke wapens te sien en daarmee te skiet.
Die baanfooi is R50 per persoon. Daar's 'n gelukstrekking met talle pryse op die spel. 'n Lootjie vir dié trekking kos R50. Meyer sê enigeen wat iets wil bydrae, hoe gering ook al, is welkom om hom te skakel by 044 873 5426.
'Ons bring jou die nuutste George, Tuinroete nuus'
