SUID-KAAP NUUS - Die Highgate SWD tweekampspan is terug vanaf die 41ste SA tweekampkampioenskappe die afgelope naweek in Bloemfontein.
Meer as 660 van die Suid-Afrika se top tweekampatlete van 14 provinsies het daar meegeding om die kroon as die beste atleet in hulle ouderdomsgroepe.
Die WP het hulle nasionale spantitel met welslae verdedig, met die gasheerprovinsie, Suid-Vrystaat, in die tweede plek en Gauteng-Noord derde. SWD het in die sesde plek geëindig. SWD se seniors het vir 'n groot verassing gesorg deur vierde te eindig.
SWD se groot ster was ongetwyfeld Johan Windt. Hy het ten spyte van 'n dyspierbesering 'n nuwe SA rekord van 2 433 punte opgestel. Dit was veral in die swemafdeling (34,77) waar hy goed presteer het. Hier het hy sy beste tyd met vier sekondes verbeter.
Windt is ook aangewys as die senior victor ludorum van die SA kampioenskappe.
Ook Chris van Wyk (senior veterane - 2 304 punte) het 'n silwer medalje huis toe gebring en Gustav Schlechter die brons medalje (seuns o/17) met 2 346 punte.
- Yvette Borrett: dames veterane, vierde (2 375)
- Luca Potgieter: seuns o/11, sewende (2 143)
- Ludik Muller: seuns o/13, negende (2 227)
- André Kleynhans: seuns o/17, agste (2 258)
- Bernard Zaayman: junior veterane, tiende (2 029)
- Marius Schlechter: senior veterane, sesde (2 085)
- Kurt Tohermes: mans meesters, vierde (2 297)
- Lara Schlechter: dogters o/17, sesde (2 274)
- Tanya Osborne: dames veterane, sewende (2 312)
SWD het ook vyf atlete met gestremdhede ingeskryf. Jannie Lourens was die beste mans-atleet en Michelle Lombard die beste dames-atleet.
Sante Fe Spur, Karoopot en Brian's Grill het aanmoedigingspryse aangebied en die volgende atlete het daarmee weggestap:
- Senior mans: Johan Windt
- Senior dames: Yvette Borrett
- Junior mans: Gustav Schlechter
- Junior dames: Lara Schlechter
Die SWD atlete met gestremdhede (Eljada - Oudtshoorn) is luid toegejuig toe hulle omgedraai het en die blinde atleet van Guateng-Noord, Amanda Blom, gaan ondersteun het.
Die SWD span in die optog tydens die opening.
'Ons bring jou die nuutste Tuinroete, Klein Karoo, Hessequa nuus'
