SUID-KAAP NUUS - Die Elroy Gelant-nagwedlope het Woensdagaand in 'n feestelike atmosfeer op Pacaltsdorp plaasgevind. Die wedlope is deur Rainbow-atletiekklub in George en Elroy Gelant aangebied en het 450 atlete gelok.
Die sangroepe Rastas, Koikoi, Hakkies-draad en Idols het bygedra dat die verrig-tinge 'n groot sukses was.
Die Olimpiese atlete Elroy Gelant en Anél Oosthuizen het ook deelgeneem. Die 19-jarige Ruben Dlephu van Langeberg-atletiekklub was eerste oor die wenstreep in die 8 km-padwedloop vir ope mans. Die Nedbank SWD atlete, Elfonzo Pieterse en Dullan Solomons was onderskeidelik tweede en derde oor die wenstreep.
Die ope-vroue afdeling is oorheers deur Andrea Steyn van KPMG, Leilani Scheffer van Run & Walk for Life van Rustenburg en Stephany Petro van Rainbow-atletiekklub in George.
Die 4 km-wedloop vir ope mans is gewen deur Christopher Swart, 'n graad 11-leerder by Hoërskool Waterkloof in Pretoria. Wayden Kombele en Lloyd Bosman het hom gevolg.
Abegail Nelson, Shalanda Bernard en Annike Charles het die ope vroue-afdeling oorheers.
Die 2 km-pretloop is gewen deur Antonio Farmer, Durando Aweries en Raymonde Samson.
Nolene van Rensburg, 'n leerder van Hoërskool Outeniqua, het die ope-vroue afdeling gewen. Julia Klassen en Shane Webb was onderskeidelik tweede en derde oor die wenstreep.
Anel se borg, Skechers, het drie paar skoene geborg vir die wenners in die 2 km-pretloop.
Gelant het na die wedloop aan die George Herald gesê: "Graag wil ons as atlete en gemeenskap almal bedank vir hul ondersteuning en bydrae wat hierdie dag spesiaal gemaak het.
Die wedlope wat vanaand plaasgevind het kan opgeteken word in die annale. Hierdie gebeurtenis het gesorg vir vele blydskap, pret en plesier, met die doel om die gemeenskap en atletiek bymekaar te bring en 'n gevoel van eenheid te skep. Die dag het vele hoogtepunte opgelewer van wenners in die verskillende kategorie. Ek is baie in my noppies dat ek en Anel ook kon deelneem en gesellig met die deelnemende atlete en gemeenskap kon verkeer.
Hierdie jaar het ook gesorg vir 'n toename in die getalle van inskrywings sedert 2015 toe dit die eerste keer aangebied is en die plan is om hierdie gebeurtenis 'n jaarlikse instelling te maak."
Elroy se boodskap aan George se jeug is: "Moet niks as vanselfsprekend aanvaar nie, droom groot, wees gedissiplineerd, respekteer een en elk, wees hardwerkend met 'n glimlag in alles wat jy aanpak en besef hoe geseënd jy is met die spesiale gawe wat jy van God ontvang het."
Moses Gericke, president van Atletiek SWD het gesê: "Dit is 'n goeie geleentheid vir die gemeenskap van Pacaltsdorp om gesondheidsbewus te raak. Dis ook 'n geleentheid vir ons ouer gemeenskap om 'n balans tussen sport en kultuur te handhaaf.
Pacaltsdorp is 'n gemeenskap wat oor die jare bewys het dat hul oor 'n sterk sportpotensiaal beskik. Hul rugbyspan is vir drie jaar agtereenvolgens SWD se klubkampioenspan en die Olimpiese atleet, Elroy Gelant, 'n trotse boorlng van Pacaltsdorp, is 'n rolmodel vir die gemeenskap.
Rainbow-atletiekklub en Elroy Gelant verdien 'n pluimpie dat hulle die wedlope so suksesvol aangebied het. Ons doelwit vir 2017 is om minstens 1000 deelnemers te lok."
'Ons bring jou die nuutste Tuinroete, Klein Karoo, Hessequa nuus'
