GEORGE NUUS - Kabeldiefstal is besig om ernstige skade aan die elektriese infrastruktuur langs die N2 te veroorsaak. George-munisipaliteit bied 'n beloning van R2 500 aan vir enige inligting wat kan lei tot die suksesvolle vervolging van vandale.
George Herald het op versoek van 'n lid van die publiek ondersoek ingestel oor gebreekte infrastruktuur en gesteelde elektriese kabels langs die sypaadjie by die Yorkstraat / N2 aansluiting.
Op die toneel is talle lamppale langs die sypaadjie langs die hoofweg gevind en al wat oor is van die elektriese kabels is die plastiekomhulsel.
Die munisipaliteit se waarnemende direkteur: elektrotegniese dienste, Jacques Lawrence, het by navraag bevestig dat hulle van die spesifieke voorval bewus is en dat hulle al talle voorvalle in verbinding met kabeldiefstal by die polisie aangemeld het.
Verder aan langs die hoofweg, tussen Thembalethu en die Garden Route Mall, lyk die prentjie dieselfde.
Volgens lt.kol. Malcolm Pojie, Wes-Kaapse polisiewoordvoerder, het Conville-speurders die afgelope twee maande twee sake van diefstal of skade aan noodsaaklike infrastruktuur (elektriese kabels) ondersoek wat deur die elektrotegniese afdeling van die munisipaliteit aangemeld is.
Oopgebreekte plastiekpype lê verstrooid langs die sypaadjie wat geleë is langs die Yorkstraat / N2-aansluiting.
Die eerste voorval het tussen 30 September en 1 Oktober langs die N2-brug aangrensend met Parkdene plaasgevind. In die geval is 'n 34-jarige man in hegtenis geneem wat reeds in die hof verskyn het.
Die tweede voorval het op 11 Oktober ook langs die N2 plaasgevind, maar aangrensend met Ballotsview. Die persoon is op 22 Oktober in hegtenis geneem en moet nog in die hof verskyn.
Dus is daar minstens drie liggings langs die N2 waar opportuniste munisipale eiendom beskadig en waardevolle eiendom steel wat 'n verwoestende effek op die bestaan en veiligheid van inwoners het.
"Ons sal voortgaan met ons pogings om hierdie voorvalle hok te slaan. Ons doen 'n beroep op gemeenskappe om voorvalle wat hulle waarneem onmiddellik aan te meld," sê Pojie.
Lawrence het bygevoeg dat die fondse wat tans gebruik word om beskadigde en gesteelde kabels te herstel of te vervang, beter gebruik kan word.
"Dit kan beter aangewend word vir George-inwoners wat nog nie voldoende beligting het nie. Dit beroof burgers dus van gehalte en voldoende dienste."
Hy sê die toename in vandalisme en diefstal het 'n negatiewe uitwerking op George se voorraadvlakke en hulle probeer voortdurend onderdele aanhou.
Maar as dit nie gestop word nie, kan dit verdere vertragings vir sommige kritieke materiale tot gevolg hê.
Talle lamppale is afgebreek in 'n poging om by die elektriese kabels in die pale uit te kom.
Versoek vanaf munisipaliteit
Die publiek word versoek om mense wat aan munisipale eiendom peuter, verf, breek of steel, by die polisie en Wetstoepassing (044 801 6350 of 044 801 6300 na-ure) aan te meld sodra dit gebeur. As jy foto's van die skuldiges kan neem terwyl hulle die misdaad pleeg, sonder om jouself in gevaar te stel, sal dit baie help.
Daar sal nie van die informant vereis word om te getuig nie aangesien die munisipaliteit die identiteit van die informant sal beskerm. Die informant sal hul besonderhede aan relevante owerhede verskaf.
‘Ons bring jou die nuutste Tuinroete, Hessequa, Karoo nuus’
