GEORGE NUUS & VIDEO - Die GO GEORGE-busdiens het gistermiddag om 14:30 hul roete tussen die middedorp en Blanco vir sowat ‘n halfuur gestaak nadat ambassadeurs van Blanco dreigend opgetree het.
Dit het gevolg nadat hulle vroeër in Junie meegedeel is dat hul kontrakte nie na 30 Junie hernu gaan word nie. Hulle het almal Maandag en Dinsdag vir hul werk opgedaag.
Nadat die ambassadeurs gister gehoor het hulle gaan nie verder vir hul dienste betaal word nie, want hulle is nie meer in diens van GO GEORGE nie, het hulle gedreig om moeilikheid te maak.
Ofskoon Morné Lakay, ‘n bestuurslid van GO GEORGE, antwoorde vir vandag beloof het, is dit onwaarskynlik dat ‘n vergadering vandag kan plaasvind. James Robb is tans in Kaapstad, en van die ander rolspelers soos Naik en Lindsay Mooiman van siviele ingenieurswese is ook nie vandag beskikbaar nie.
In ‘n verklaring op die GO GEORGE-webblad is geskryf: “Enige beloftes van voortgesette kontrakte wat deur individue buite die munisipale administrasie gemaak is, word betreur en is waardeloos.” Die verklaring maak dit duidelik dat die aanstellings van meet af tydelik was. “Dit is heeltemal onwaar dat hulle moet plek maak vir 120 ambassadeurs in Thembalethu.” En dan verder: “Die GO GEORGE-bestuur beklemtoon dat ‘n beleid van geen verdraagsaamheid van toepassing sal wees op mense wat eiendom beskadig, operasionele werking van die busdiens belemmer of passasiers en personeel intimideer, en dat hulle onverwyld vervolg sal word.”
Dit het aan die lig gekom dat die beloftes tydens die vergadering deur wyksraadslede gemaak is. Volgens Robb is dit nodig dat amptenare en politici volgende week Maandag eers vergader om die kwessie te bespreek, alvorens ‘n vergadering met die ambassadeurs gehou word. “Die beloftes is nie deur mesne binne die administrasie gemaak nie,” het hy bevestig.
Kyk na 'n video hier onder.
Ongelukkige ambassadeurs in Blanco gister.
'Ons bring jou die nuutste George, Tuinroete nuus'
